OBSH i kërkon Azisë Juglindore “masa agresive” kundër koronavirusit
Organizata Botërore e Shëndetësisë (OBSH) kërkoi nga Azia Juglindore të ndërmarrë “masa agresive” për të luftuar shpërthimin në rritje të koronavirusit.
Apeli vjen derisa numri i të infektuarve në botë vazhdon të rritet, duke i detyruar vendet të mbyllin kufijtë dhe shkollat.
Rajoni i Azisë Juglindore i OBSH-së përfshin 11 shtete dhe gati të gjitha prej tyre kanë regjistruar raste me koronavirus.
Ato përfshijnë: Malajzinë, Indonezinë, Shri Lankën, Tajlandën, Bangladeshin dhe Korenë e Veriut.
Poonam Khetrapal Singh, drejtor rajonal i OBSH-së për Azinë Juglindore, tha se “gjithnjë e më shumë raste të transmetimit të koronavirusit janë duke u konfirmuar”.
“Qartazi, na duhet të bëjmë më shumë dhe urgjentisht”, tha ai.
Malajazia ka numrin më të madh të të infektuarve me koronavirus në rajon – mbi 670 raste.
Një rikujtim i disa këshillave të Organizatës Botërore të Shëndetësisë:
Këshillat e OBSH-së për koronavirusin
Australia me masa të reja kundër koronavirusit
Australia i ndaloi tubimet “jothelbësore” të më shumë se 100 njerëzve, në përpjekje për të frenuar pandeminë e koronavirusit.
Kryeministri Scott Morrison njoftoi për masat e reja të mërkurën.
Por, ai tha se shkollat, transporti publik dhe sheshet publike do të mbeten të hapura.
Australia ka mbi 450 njerëz të infektuar me koronavirus, ndërsa pesë pacientë atje kanë humbur jetën.
"Ne nuk e kemi parë këtë lloj gjëje në Australi që nga fundi i Luftës së Parë Botërore. Por, do t’ia dalim së bashku”, tha Morrison, duke i bërë thirrje publikut të mbetet i qetë.
Von der Leyen: Politikanët e nënvlerësuan koronavirusin
Udhëheqësit politikë “e nënvlerësuan” shkallën e rrezikut që paraqet koronavirusi, tha presidentja e Komisionit Evropian, Urusla von der Leyen.
“Mendoj se të gjithë ne, që nuk jemi ekspertë, e kemi nënvlerësuar fillimisht koronavirusin”, tha von der Leyen në një intervistë për gazetën gjermane, Bild.
“Tani, është e qartë se ky është një virus që do të na mbajë të zënë për një kohë të gjatë”, tha ajo.
Bashkimi Evropian ka marrë vendim të martën që të ndalojë hyrjen e udhëtarëve prej jashtë bllokut, për 30 ditë, në përpjekje për të frenuar përhapjen e koronavirusit.
- Lajmin e zgjeruat mund ta lexon këtu.