Ndryshon orari i kufizimit të lëvizjes së qytetarëve në Kosovë
Qeveria në detyrë e Kosovës ka vendosur që të ndryshojë orarin e ndalimit të qarkullimit të qytetarëve dhe automjeteve private, si masë për parandalimin e përhapjes së koronavirusit të ri.
Qeveria ka miratuar kërkesën e Ministrisë së Shëndetësisë, duke ndaluar qarkullimin e qytetarëve dhe automjeteve private nga ora 17:00 deri në orën 06:00, si dhe ka ndaluar qytetarët të qarkullojnë nëpër sheshe të hapura.
Më herët, qeveria kishte vendosur dy orare për ndalimin e qarkullimit të qytetarëve dhe automjeteve, përkatësisht nga ora 10:00 deri në 16:00 dhe nga ora 20:00 deri në orën 06:00.
Deri më tani, në Kosovë janë regjistruar 88 raste me koronavirusin e ri, ndërsa një pacient ka vdekur.
Kongresisti i katërt amerikan diagnostikohet me koronavirus
Edhe një tjetër anëtar i Kongresit të Shteteve të Bashkuara ka dalë pozitiv në testet për koronavirus.
Përfaqësuesi demokrat, Joe Cunningham, tha se është testuar më 26 mars dhe se është diagnostikuar një ditë më vonë.
Ai tha se simptomat e tij kanë nisur tashmë të përmirësohen.
Cunningham tha se është vetizoluar qysh më 19 mars, kur ka mësuar se ka qenë në kontakt me një tjetër ligjvënës që ka dalë pozitiv.
Senatori Rand Paul dhe përfaqësuesit Ben McAdams dhe Mario Diaz-Balart kanë thënë po ashtu se kanë dalë pozitivë në testet për koronavirus.
Së paku 26 anëtarë të Dhomës së Përfaqësuesve dhe të Senatit në SHBA janë vetizoluar pasi kanë pasur kontakte me njerëz të diagnostikuar.
Shtetet e Bashkuara kanë mbi 100,000 raste të konfirmuara të të infektuarve me koronavirus – më shumë se çdo vend tjetër.
Sipas të dhënave të Universitetit Johns Hopkins, 1,581 pacientë kanë vdekur në SHBA.
SHBA e ndihmon Kosovën me 1.1 milion euro në luftën kundër koronavirusit
Departamenti amerikan i Shtetit i ka ndarë Kosovës 1.1 milion euro për luftimin e koronavirusit.
Qeveria në largim e Kosovës tha se është informuar në lidhje me vendimin nga Ambasada e Shteteve të Bashkuara të Amerikës në Prishtinë.
"Ky është edhe një lajm tjetër shumë i mirë për qytetarët e vendit tonë, ngase pardje nga Bashkimi Evropian siguruam 68 milionë euro. Përkushtimi i Qeverisë është në nivelin e duhur për t'u përballur me këtë pandemi", thuhet në komunikatën për media të qeverisë në largim.
Sekretari amerikan i Shtetit, Mike Pompeo, ka thënë më 26 mars se Shtetet e Bashkuara kanë ndarë afro 274 milionë dollarë fonde humanitare për të ndihmuar vendet e rrezikuara në luftën kundër koronavirusit.
Ambasada e Shteteve të Bashkuara në Prishtinë, përmes një postimi në Twitter, ka thënë se ky është një lajm i mirë për Kosovën.
Në Kosovë janë të infektuar 88 persona me koronavirus, ndërsa një pacient ka humbur jetën.
