Rritet numri i rasteve të dhunës familjare në Francë
Franca është vetëm një prej shteteve, duke përfshirë Mbretërinë e Bashkuar, që kanë paralajmëruar për rritje të numrit të rasteve të dhunës në familje, teksa koronvirusi i ri po detyron njerëzit të qëndrojnë në shtëpi.
Numri i rasteve të dhunës është rritur për 32 për qind për një javë, ka thënë Sekretarja Shtetërore për Barazi Gjinore, Marlène Schiappa.
Franca planifikon të prezantojë një sistem urgjent të paralajmërimit në dyqane, por edhe online për të gjitha viktimat e këtij lloji të abuzimit.
Deri më tani në Francë është raportuar për 45,170 të infektuar dhe 3,030 të vdekur si pasojë e sëmundjes Covid-19, që shkakton koronavirusi.
Informacioni për koronavirusin mposht panikun
Doktor Ilir Alimehmeti, epidemiolog klinik, thotë se sëmundja COVID-19 bën pjesë akoma në mesin e problematikave të moderuara. Në një intervistë për magazinën Expose të Radios Evropa e Lirë, Alimehmeti, po ashtu ligjërues në Universitetin e Mjekësisë në Tiranë, shpjegon se kush preket më së shumti nga sëmundja, sa është e cenueshme popullsia e Ballkanit dhe kur mund të pritet ndalja e hovit të saj.
Spanja regjistron rekord të viktimave në 24 orë
Spanja ka regjistruar një rekord prej 849 vdekjeve të reja të lidhura me koronavirusin e ri, njëherësh shifrën më të lartë brenda 24 orëve, prej kur shtet është përballur me shpërthim të kësaj pandemie.
Sipas të dhënave të Ministrisë së Shëndetësisë, numri i të vdekurve në këtë vend ka arritur 8,189.
Aktualisht, Spanja është vendi i prekur më së keqi nga ky virus në Evropë, pas Italisë.
Numri total i personave të infektuar në këtë shtet tani ka kaluar Kinën duke arritur në 94,417.
Aktualisht janë duke u analizuar mundësitë e bartjes së disa pacientëve nga Madridi dhe Katalonja, njëherësh zonave të prekura më së keqi nga sëmundja, drejt pjesëve të tjera të Spanjës.
