Numri i viktimave nga koronavirusi në Britani kalon 3,600
Britania regjistroi të premten edhe 684 viktima nga koronavirusi.
Lajmi u bë i ditur nga Departamenti i Shëndetësisë dhe Kujdesit Social.
Numri i përgjithshëm i viktimave në Britani tani është 3,605.
Sipas të dhënave të Universitetit Johns Hopkins, ky vend ka numrin më të madh të të infektuarve, pas Sheteve të Bashkuara, Spanjës, Italisë, Gjermanisë, Kinës, Francës dhe Iranit.
Lexoni edhe këtë:
Dy viktima të reja me COVID-19 në Maqedoninë e Veriut
Dy viktima të reja nga koronavirusi janë regjistruar në Maqedoninë e Veriut.
Viktimat janë dy burra, njëri i moshës 68 vjeç nga Tetova dhe tjetri një 70-vjeçar nga Kumanova.
Sipas njoftimit të Ministrisë së Shëndetësisë, ata ishin të sëmurë kronikë.
Me dy viktimat e reja, numri i të vdekurve me koronavirus në Maqedoninë e Veriut ka arritur në 13.
Ndërkohë, janë regjistruar edhe 46 raste të reja të të infektuarve, duke e çuar në 430 numrin e përgjithshëm të personave me COVID-19 – sëmundjen që e shkakton koronavirusi.
Prej tyre, 11 janë punonjës shëndetësorë në spitalin e Kumanovës.
Tre nga të infektuarit janë nga reparti i rentgenit, tre nga reparti i kirurgjisë, një infermiere nga reparti i gjinekologjisë, një ndihmës dhe një mjek specializant nga reparti infektiv.
Drejtorja e spitalit, Snezhana Zaharieva, ka thënë se për gjendjen e krijuar është njoftuar Ministria Shëndetësisë, e cila pritet të dalë me masa, në ndihmë të spitalit.
Numri më i madh i të inektuarve me koronavirus është në Shkup, gjithsej 208 raste, kurse nga qytetet tjera me numrin më të madh janë: Kumanova (85), Dibra (49) dhe Prilepi (22).
Pandemia do t’i kushtojë ekonomisë globale mbi 4 trilionë dollarë
Ekspertët botërorë të ekonomisë sugjeruan se ndikimi ekonomik i koronavirusit ka dalë në pah më ashpër seç pritej.
Boerge Brende, president i Forumit Botëror Ekonomik, tha se rimëkëmbja do të jetë e mundur vetëm përmes “veprimit të koordinuar global”.
Ai i bëri komentet pasi Banka Aziatike e Zhvillimit parashikoi se pandemia do t’i kushtojë ekonomisë globale 4.1 trilionë dollarë, ose aro 5 për qind e të gjithë aktivitetit ekonomik.
Kjo bankë, që është huadhënëse rajonale, tha se rritja në Azi ka të ngjarë të bie në 2.2 për qind në vitin 2020, nga 5.2 për qind sa ka qenë vitin e kaluar.
Ajo po ashtu parashikoi rënie vjetore të bruto prodhimit të brendshëm për rreth 10 për qind për Eurozonën.
Në përpjekje për të frenuar përhapjen e koronavirusit, shumë vende të botës kanë mbyllur ose kanë zvogëluar kapacitetet e kompanive prodhuese.
Kjo ka bërë që edhe çmimet e naftës të bien në nivele rekorde.
Kryeministri britanik duhet të vazhdojë vetizolimin
Kryeministri britanik, Boris Johnson, do të mbetet i vetizoluar, pasi vazhdon të ketë simptoma të koronavirusit, përfshirë temperaturë.
Johnson ka dalë pozitiv në testin për koronavirus të premten e kaluar dhe është dashur të dalë sot nga vetizolimi.
“Edhe pse ndjehem më mirë dhe i kam kaluar shtatë ditët e izolimit, vazhdoj të kem simptoma të lehta”, tha Johnson në një video të postuar në Twitter.
“Kam ende temperaturë, kështu që në përputhje me këshillat e qeverisë, duhet të vazhdoj izolimin tim derisa të kalojë kjo simptomë”, shtoi Johnson.
Ai vazhdon të punojë nga shtëpia dhe, mëngjesin e së premtes, ka kryesuar një takim për koronavirusin.
Johnson po ashtu u bëri thirrje qytetarëve britanikë që të mos dalin nga shtëpitë.