Kanadaja ende larg lehtësimit të kufizimeve
Kryeministri kanadez, Justin Trudeau, thotë se vendi është ende me javë larg nga lehtësimi i kufizimeve për shkak të pandemisë, nëse jo më gjatë.
"Duhet të qëndrojmë kështu për një kohë", tha ai gjatë një konference për media të martën.
Kanadezët duket se e mbështesin Trudeaun në masat që ka ndërmarrë për të penguar përhapjen e virusit.
Një sondazh nga organizata "Leger" zbuloi se 21% e kanadezëve preferojnë të presin zbulimin e një vaksinë në mënyrë që të lehtësohen kufizimet.
Zbulimi i vaksinës llogaritet të jetë një vit larg. Vetëm 6% e qytetarëve kanadezë thanë se donin që ekonomia të hapet tani. Provinca e Ontarios, e cila përbën 41% të popullsisë së Kanadasë, zgjati gjendjen emergjente edhe për katër javë tjera.
Shqipëria kontrollon lëvizjet e qytetarëve përmes dronëve
Shqipëria ka shtrënguar masat e kufizimit dhe kontrollet për të parandaluar përhapjen e koronavirusit të ri. Policia përdori dronët për të monitoruar nëse njerëzit po shkelnin masat e ndalimit të lëvizjes. Kontrollet me dronë u bën në shumë qytete përfshirë Tiranën, Shkodrën dhe Gjirokastrën.
Qeveria në detyrë planifikon pakon e dytë për rimëkëmbje ekonomike
Këshilli Kombëtar për Zhvillim Ekonomik i Kosovës ka diskutuar hapat e mëtutjeshëm me qëllim të zbutjes së ndikimit negativ në ekonominë e vendit të shkaktuar nga pandemia COVID-19.
Ekonomia e Kosovës konsiderohet të jetë ndikuar negativisht nga situata e krijuar me pandeminë e koronavirusit.
Kryeministri në detyrë i Kosovës Albin Kurti, theksoi se përveç masave për t’i dalë në ndihmë shëndetit publik, qeveria në detyrë ka marrë edhe masat për t’i dalë në ndihmë shëndetit ekonomik.
Artikullin e plotë mund ta lexoni në këtë link.
Vazhdon rritja e numrit të të infektuarve në Turqi
Në Turqi gjatë 24 orëve janë konfirmuar edhe 4,062 raste me koronavirusin e ri.
Numri i përgjithshëm i të infektuarve ka arritur në 65,111, tha ministri i Shëndetësisë, Fahrettin Koca.
Të vdekur nga sëmundja janë regjistruar 107, duke e çuar numrin e përgjithshëm të viktimave në 1,403.
Sa i përket rasteve të shëruara, ministri tha se 4,799 persona janë shëruar deri më tani.