Thaçi kërkon angazhim në parandalimin e përhapjes së koronavirusit në burgje
Presidenti i Kosovës, Hashim Thaçi ka kërkuar nga krerët e institucioneve të drejtësisë që të ndërmerren të gjitha masat për të parandaluar përhapjen e koronavirusit në institucionet korrektuese të Kosovës.
“Është në pyetje shëndeti i qytetarëve dhe është me rëndësi që institucionet e Republikës së Kosovës të kujdesen për çdo qytetar dhe të gjejnë zgjidhje për çdo qytetar, në përputhje me ligjet në fuqi”, ka deklaruar Thaçi.
Sipas tij në gjetjen e një zgjidhjeje më të shpejtë duhet të përfshihet edhe Kuvendi i Kosovës.
Thaçi i bëri këto komente në një takim me Drejtorin e Përgjithshëm të Shërbimit Korrektues, Nehat Thaçi, Kryetarin e Gjykatës Supreme, Enver Peci, Kryetarin e Gjykatës së Apelit, Hasan Shala, Kryetaren e Gjykatës Themelore në Prishtinë, Afërdita Bytyçi, Kryeprokurorin e Shtetit, Aleksandër Lumezi dhe Kryeprokurorin e Prokurorisë Themelore në Prishtinë, Kujtim Munishi.
Përndryshe, Këshilli për Mbrojtjen e të Drejtave dhe Lirive të Njeriut (KMDLNj) ka kërkuar nga institucionet e Kosovës që disa kategori të të burgosurve të lirohen nga vuajtja e dënimit, pas shpërthimit të pandemisë së koronavirusit.
Të njëjtën kërkesë ditë më parë e ka parashtruar edhe Qendra Kosovare për Rehabilitimin e të Mbijetuarve të Torturës (QKRMT), e cila ka kërkuar nga institucionet që të bëhen ndryshime ligjore, me qëllim të lirimit të përkohshëm apo amnistisë së të burgosurve në kohën e pandemisë.
Sipas këtyre organizatave, Kosova aktualisht ka rreth 2,000 persona të burgosur.
Ditë më parë është raportuar për dy gardianë të infektuar me koronavirus në burgun e Mitrovicës Veriore.
Kosova aktualisht ka 387 raste të konfirmuara me koronavirus; 9 pacientë kanë vdekur, ndërsa 69 janë shëruar.
Nga dita e mërkurë në këtë shtet kanë hyrë në fuqi masat e reja të qarkullimit të qytetarëve.
Turneu i çiklizmit në Francë zhvillohet në fund të gushtit
Turneu i çiklizmit në Francë do të nisë më 29 gusht, pas vendimit të marrë nga Qeveria francize për ndalim të grumbullimeve masive deri në mesin e muajit korrik, për shkak të pandemisë me koronavirus.
Kjo garë ishte planifikuar të mbahej nga 27 qershori deri më 19 korrik.
“Zhvillimi i kësaj ngjarjeje me kushtet më të mira, është thelbësor për shkak të rolit që ka në ekonominë e çiklizmit”, ka thënë trupi udhëheqës i sportit në këtë vend.
Shumë organizime tjera sportive këtë vit, ose janë pezulluar, sikurse gara e tenisit, Wimbledon, apo janë shtyrë për vitin e ardhshëm sikurse Lojërat Olimpike dhe Kampionati Evropian i Futbollit.
Fituesi i katërfishtë, Chris Froome ka thënë se do t’i kthehet garës që do të nisë në qytetin Nicë, pas mungesës së vitit të kaluar, për shkak të një aksidenti.
“Lajmi të cilin e kemi pritur shumë prej nesh. Pak dritë në fund të tunelit”, ka thënë ai.
Deri më tani në Francë janë infektuar 131,362 persona me koronavirusin e ri, prej tyre 15,750 kanë vdekur.
BE kërkon “qasje graduale” ndaj lehtësimit të izolimit
Bashkimi Evropian ka bërë publike rekomandimet për vendet anëtare, që duan të lehtësojnë masat e izolimit nga koronavirusi.
Presidentja e Komisionit Evropian, Ursula von der Leyen, tha se parakushtet kryesore për shtetet janë që të kenë rënie të dukshme të numrit të të infektuarve, kapacitete të mjaftueshme në sistemet e tyre shëndetësore dhe monitorim adekuat.
“Në përgjithësi, ne rekomandojmë qasje graduale dhe çdo veprim duhet të monitorohet vazhdimisht", tha von der Leyen.
Sipas saj, qëllim i rekomandimeve është “të sigurohet një dalje e koordinuar nga masat e kontrollit”.
Këtë javë, disa vende të Bashkimit Evropian kanë nisur t’i lehtësojnë masat e izolimit kundër përhapjes së koronavirusit.
Prej tyre, edhe Italia - vendi më i goditur i Evropës, me më shumë se 21,000 viktima nga koronavirusi - i ka lejuar disa firma të rifillojnë operimet.
