Ministria e Drejtësisë bën thirrje kundër dhunës në familje
Ministrja në detyrë e Drejtësisë, Albulena Haxhiu përmes një videomesazhi ka njoftuar se për shkak të qëndrimit në shtëpi si pasojë e përhapjes së koronavirusit janë rritur edhe shifrat e dhunës në familje.
Ministrja Haxhiu ka thënë se autoritetet kanë ndërmarrë masa emergjente duke bërë që strehimoret të jenë të përgatitura për reagim si dhe janë vendosur në dispozicion tre numra të veçantë telefoni që pranojnë thirrje 24 orë në ditë.
“Qëndrimi në shtëpi, rritja e stresit dhe pasiguria, ka shënuar rritje të rasteve të raportuara të dhunës në familje kudo në botë, por edhe në Kosovë. Të jesh e mbyllur me abuzuesin është më keq se burg, sepse ata mund të përfitojnë nga situata e krijuar për të mos i lejuar partnerët të dalin jashtë dhe të kërkojnë ndihmë”, është shprehur ajo.
Krahasuar me muajt e kaluar, në muajin mars në Kosovë janë shtuar rastet e dhunës në familje.
Rritjen e shifrave e ka konfirmuar edhe Policia e Kosovës. Sipas të dhënave të Policisë, në muajin mars ka një rritje të vogël të rasteve kur qytetarët kanë raportuar ushtrimin e dhunës ndaj tyre, gjithsej 169 raste.
Policia përmes një apeli drejtuar qytetarëve u bëri thirrje të gjithë personave që janë viktima të dhunës t’i lajmërojnë rastet në polici.
Përveç Kosovës, në shumë vende të tjera të botës është raportuar për rritje të rasteve të dhunës në familje për shkak të qëndrimit në shtëpi në kuadër të masave parandaluese kundër pandemisë së koronavirusit.
Me qëllim të parandalimit të përhapjes së sëmundjes Covid-19, që shkakton koronavirusi të mërkurën në Kosovë kanë hyrë në fuqi masat e reja të qarkullimit të qytetarëve.
Deri më tani Kosova ka 423 raste të konfirmuara me koronavirus; 9 pacientë kanë vdekur, ndërsa 74 janë shëruar.
Veterani britanik mbledh 12 milionë funta për punëtorët shëndetësorë
Veterani britanik 99-vjeçar i Luftës së Dytë Botërore, Tom Moore ka mbledhur më shumë se 12 milionë funta për punëtorët shëndetësorë që po luftojnë koronavirusin, përmes ecjeve në kopshtin e tij.
Kapiteni ushtarak i pensionuar ka përfunduar 100 xhiro në kopshtin e tij 25 metra me ndihmën e protezës për ditëlindjen e tij të 100-të në fund të muajt.
“Unë kurrë nuk kam ëndërruar se do të përfshihem në një ngjarje si kjo”, ka thënë ai kur ka përfunduar ecjen.
Ai kishte planifikuar fillimisht të krijonte një fond prej 1,250 funtave për bamirësi.
Mirëpo më vonë, 600,000 persona kanë kontribuuar në fond, çfarë ka ndikuar në bllokim të faqes së donacioneve, për shkak të trafikut të madh.
“Në luftërat e kaluara, unë kam qenë ushtar me uniformë në vijën e parë të frontit. Këtë herë ushtria jonë janë mjekët dhe infermierët në uniformë”, ka thënë ai për një medium britanik.
“Ne do ta tejkalojmë këtë”.
Moore ka shërbyer në Indi, Mianmar dhe Indonezi gjatë Luftës së Dytë Botërore.
Zvogëlimi i qarkullimit të automjeteve përmirëson cilësinë e ajrit
Masat e ndërmarra për parandalimin e përhapjes së koronavirusit, sidomos reduktimi i lëvizjes së automjeteve, kanë ndikuar që në Kosovë të përmirësohet cilësia e ajrit deri në 50%, thonë zyrtarët.
Kryeshefi i Agjencisë për Mbrojtjen e Mjedisit në Kosovë, Ilir Morina, thotë për Radion Evropa e Lirë se matja e cilësisë së ajrit bëhet në 12 stacione dhe se në të gjitha prej tyre ka rënie të dyoksidit të azotit, që është produkt i djegies së karburanteve nga automjetet.
“Transporti është një ndër ndotësit më të mëdhenj. Numri [i makinave] sillet rreth 400 mijë, duke mos numëruar makinerinë e rëndë, [pastaj] industrinë private, minierat e të tjera. Nëse krahasohet muaji mars i vitit të kaluar me periudhën e njëjtë të këtij viti, vërehet një përmirësim i dukshëm, deri në 50 për qind. Edhe pse janë burim i dytë i ndotjes, pas energjisë, automjetet kanë ndikuar shumë në zvogëlimin e ndotjes”, thotë Morina.
Por, cilat janë mundësitë tjera që do të ndikonin në ulje të ndotjes në periudhë afatgjatë?
Hollësitë i kuptoni këtu
Hungaria do të dëbojë 14 iranianë që shkelën rregullat e karantinës
Hungaria ka thënë se do të dëbojë 14 studentë iranianë më 16 prill, për shkak të shkeljes së rregullave të karantinës, pas përhapjes së koronavirusit.
Iranianët kanë pasur “sjellje anti-shoqërore”, teksa ka qenë në karantinë në një spital në Budapest muajin e kaluar, ka thënë togeri policer, Robert Kiss.
Më 16 prill pritet të dëbohen 11 studentë, ndërsa të tjerët më 23 prill.
Dëbimet vijnë pas ankesave të bëra nga Ministria hungareze e Shëndetësisë, e cila ka akuzuar studentët se kanë dalë nga dhomat e spitalit pa leje dhe pa pajisje mbrojtëse.
Ata kanë refuzuar të kthehen nëpër dhoma dhe kanë pasur qasje agresive ndaj stafit mjekësor, ka thënë ministria.
Komitetit hungarez i Helsinkit, grup për të drejta të njeriut që përfaqëson njërin prej studentëve, i ka cilësuar akuzat e Budapestit “absurde”.
Zëdhënësi i Ministrisë së Jashtme iraniane, Abbas Mousavi, ka thënë për mediat javën e kaluar se vendimi për dëbime “është tejet fatkeq”.
Hungaria, vend me popullsi gati 10 milionë banorë, ka regjistruar pothuajse 1,600 të infektuar dhe 134 të vdekur si pasojë e sëmundjes, Covid-19, që shkakton koronavirusi.