Indonezia ndalon eksodin tradicional të Ramazanit për të frenuar koronavirusin
Në përpjekje për të frenuar përhapjen e koronavirusit, Indonezia do të ndalojë largimin e njerëzve nga qytetet në fund të Muajit të Ramazanit, tha presidenti Joko Widodo.
Indonezia ka regjistruar 590 viktima nga koronavirusi - më shumë se çdo vend tjetër në Azinë Lindore, pas Kinës.
Ekspertët e shëndetësisë kanë paralajmëruar se lejimi i miliona njerëzve të udhëtojnë në fshatrat e tyre pas Ramazanit, mund të shpejtojë përhapjen e sëmundjes.
"Kam marrë vendim për të ndaluar udhëtimin", tha Widodo në një takim të kabinetit.
Vitin e kaluar, rreth 19.5 milionë indonezianë kanë udhëtuar në fshatrat e tyre, për të festuar Festën e Bajramit, e cila shënon fundin e Muajit të shenjtë të Ramazanit.
Indonezia është vendi me popullsinë më të madhe myslimane në botë.
Aktualisht, ky vend ka mbi 6,700 të infektuar me koronavirus.
Në një studim javën e kaluar, studiuesit në Fakultetin e Shëndetit Publik të Universitetit të Indonezisë paralajmëruan se nëse eksodi lejohet, numri i të infektuarve mund të arrijë në një milion deri në muajin korrik.
Muaji i Ramazanit, gjatë të cilit besimtarët myslimanë agjërojnë, nis këtë javë dhe zgjat 30 ditë.
Kosova s’ka se si ta luftojë dezinformimin në kohën e pandemisë
Që nga shfaqja e rasteve të para të personave të infektuar me koronavirus në Kosovë, më 13 mars, ka pasur shtim të lajmeve të rreme dhe dezinfomatave.
Përmbajtje të tilla, si për zanafillën e përhapjes së virusit e deri te zbulimi i vaksinës, kanë qenë të përditshme në rrjete sociale.
Ato kanë marrë pëlqime dhe shpërndarje të shumta nga audienca shqipfolëse.
Përveçse përmbajtja ka qenë e paverifikuar, shpeshherë lajme të tilla kanë ndikuar në përhapjen e panikut.
Disa vende të botës kanë krijuar mekanizma për luftimin e lajmeve të rreme në kohën e pandemisë së koronavirusit të ri, por në Kosovë, përveç bazës ligjore që rregullon në një masë sanksionet për shpërndarjen e informacioneve të pavërteta, nuk ka një mekanizëm adekuat.
Artikullin e plotë mund ta lexoni këtu.
Gjermania publikon shifrat pas lehtësimit të masave kundër koronavirusit
Gjermania tha se ka regjistruar 1,785 raste të reja me koronavirus gjatë 24 orëve të fundit, të cilat e rrisin në mbi 143,000 numrin e përgjithshëm të të infektuarve.
Instituti i sëmundjeve infektive Robert Koch tha po ashtu se 194 njerëz kanë vdekur në 24 orët e kaluara, duke e çuar në 4,598 numrin e viktimave nga koronavirusi në Gjermani.
Shifrat e fundit paraqesin një rritje të lehtë të infektimeve të reja, pas dy ditësh rënieje.
Qeveria gjermane ka thënë se koronavirusi është nën kontroll dhe ka lejuar këtë javë hapjen e disa dyqaneve të vogla.
Megjithatë, kancelarja Angela Merkel ka kërkuar që Gjermania të jetë e kujdesshme dhe e disiplinuar në luftën kundër koronavirusit, për të shmangur, siç ka thënë ajo, rikthimin e sëmundjes në javët e ardhshme.
Gjermania do ta shohë brenda dy javësh nëse relaksimi i pjesshëm i kufizimeve në jetën publike, e ngre lart nivelin e infeksionit, ka thënë Merkel.
Gjermania, edhe pse ka numër të madh të të infektuarve, ajo ka numër më të vogël të viktimave krahasuar me vendet tjera evropiane: Italinë, Spanjën dhe Francën – secila me mbi 20,000 të vdekur.
Suksesi relativ i Gjermanisë në trajtimin e koronavirusit u është atribuar kryesisht testimeve masive.
Vdes një grua shtatzënë me koronavirus në Kosovë
Një paciente shtatzënë, e prekur me koronavirus, ka vdekur të martën në Klinikën Infektive në Prishtinë.
Në njoftimin e kësaj klinike thuhet se pacientja V.P., 40 vjeçe, me vendbanim në Gjakovë, ka qenë në mjekim intensiv që nga data 15 prill.
Me këtë vdekje, numri i viktimave nga koronavirusi në Kosovë arrin në 16.
Deri më tash, Kosova ka regjistruar 598 raste të të infektuarve – prej tyre 123 janë shëruar.
Në njoftimin e Klinikës Infektive thuhet po ashtu se në këtë repart, aktualisht janë të shtruar 55 pacientë me koronavirus.
Prej tyre, një është në gjendje kritike, 12 janë në trajtim me oksigjenoterapi dhe përkujdesje intensive, ndërsa 42 janë në gjendje stabile.