Edhe një i vdekur nga koronavirusi në Maqedoninë e Veriut
Maqedonia e Veriut ka regjistruar edhe një viktimë nga koronavirusi.
Sipas Ministrisë së Shëndetësisë, bëhet fjalë për një 80-vjeçar, i cili është pranuar në Klinikën infektive në Shkup më 21 prill.
Me këtë viktimë, numri i përgjthshëm i tyre në Maqedoninë e Veriut arrin në 57. Shumica e tyre janë regjistruar në Shkup, Kumanovë dhe Strugë.
Gjatë 24 orëve janë regjistruar edhe 26 persona të infektuar me koronavirus nga 408 teste të kryera, me çka numri i përgjithshëm i të infektuarve arrin në 1,326.
Numri i personave të shëruar gjatë orëve të fundit është 36 - shifër kjo më e lartë se numri i të infektuarve e që, sipas Ministrisë së Shëndetësisë, flet për dobësimin e virusit.
Deri më tani, në Maqedoninë e Veriut janë të shëruar 337 persona, ndërsa te 932 vetë sëmundja është ende aktive.
Përgjigjet e Organizatës Botërore të Shëndetësisë në disa nga pyetjet më të shpeshta:
Këshillat e OBSH-së për koronavirusin
Komisioni Evropian, pa përgjigje rreth ndihmës për Ballkanin P.
Komisioni Evropian është aktualisht i përqendruar në përgjigjen ndaj pandemisë së koronavirusit, por do të vazhdojë të punojë në një plan të investimeve ekonomike, tha në një konferencë për media zëdhënësja e KE-së, Ana Pisonero.
Pisonero shmangi përgjigjen në pyetjen nëse në një samit të Zagrebit, që do të mbahet muajin e ardhshëm, do të paraqitet plani i paralajmëruar për mbështetje financiare për Ballkanin Perëndimor.
“Ekziston një paketë domethënëse në tryezë. Flasim për më shumë se 410 milionë euro, plus 190 milionë euro, që do të ndihmojnë në mbajtjen e likuiditetit përmes bashkëpunimit me institucionet financiare ndërkombëtare”, tha Pisonero.
Paketa financiare për Ballkanin Perëndimor është paralajmëruar para shfaqjes së pandemisë së koronavirusit nga zyrtarë të Komisionit Evropian, përfshirë presidenten e këtij institucioni, Ursula Von der Leyen.
Samiti midis Ballkanit Perëndimor dhe Bashkimit Evropian do të mbahet në Zagreb më 6 dhe 7 maj.
Përveç paketës financiare, është planifikuar që në këtë samit të promovohet edhe metodologjia e re e zgjerimit të Bashkimit Evropian, e cila, para së gjithash, do të zbatohet me Maqedoninë e Veriut dhe Shqipërinë.
Për shkak të izolimit të shkaktuar nga panedemia, samiti do të zhvillohet në formatin e video-konferencës.
Belgjika nuk do të përdorë aplikacionet për gjurmimin e të dyshuarve me COVID-19
Qeveria e Belgjikës ka vendosur të mos përdorë aplikacione për të gjurmuar të infektuarit me koronavirus, tha ministri i Telekomunikacionit Philippe De Backer.
"Nuk ka nevojë për një aplikacion për gjurmimin e kontakteve", i tha ai kanalit televiziv belg VRT të enjten.
Aplikacionet e gjurmimit të kontakteve të personave të infektuar me koronavirus, përdoren tashmë në vendet aziatike. Por, kopjimi i qasjes së tyre duke përdorur të dhëna për vendndodhjen e personave, do të shkelte ligjet e privatësisë në Bashkimin Evropian.
Në fillim të këtij muaji, Mbikëqyrësi Evropian i Mbrojtjes së të Dhënave bëri thirrje për një aplikacion evropian për të ndjekur përhapjen e koronavirusit të ri.
Belgjika ka regjistruar 42.797 raste me COVID-19 dhe 6.490 vdekje.