Infografikë:
Njerëzit që besojnë se izolimi do t’i forcojë lidhjet familjare
Pompeo: SHBA-ja po bën më shumë se çdokush për Afrikën
Sekretari amerikan i Shtetit, Mike Pompeo, tha se vendi i tij po bën më shumë se çdo vend tjetër për të luftuar koronavirusin në Afrikë.
Duke folur përmes telefonit me gazetarët në Afrikë, Pompeo tha se SHBA-ja nuk do t’i zvogëlojë shpenzimet për kujdesin shëndetësor në botë, edhe pse administrata e presidentit Donald Trump ka ndaluar së financuari Organizatën Botërore të Shëndetësisë.
Pompeo tha se OBSH-ja është “jofunksionale”.
“Po bëjmë përpjekje masive për të ndihmuar partnerët tanë afrikanë kundër COVID-19 [sëmundjes që e shkakton koronavirusi]”, tha Pompeo.
“Asnjë vend tjetër nuk po bën më shumë se ne. Ne jemi zotuar për ndarjen e 170 milionë dollarëve për këtë luftë në Afrikë”, tha Pompeo.
Ai tha se Uashingtoni nuk dëshiron të ndërpresë ndihma, por do që paratë të shkojnë në një institucion shumëkombësh që “vërtet mund të japë rezultate të mira”.
Stoltenberg fajëson Kinën dhe Rusinë për dezinformim për koronavirusin
Sekretari i përgjithshëm i NATO-s, Jens Stoltenberg, e akuzoi Kinën dhe Rusinë për shpërndarje të dezinformatave, në lidhje me përgjigjen e aleancës ushtarake ndaj pandemisë së koronavirusit.
“Kemi disa shembuj të deklaratave që vijnë nga Moska dhe Pekini, të cilat nuk janë të sakta, të cilat përpiqen të minojnë kohezionin e aleatëve të NATO-s dhe të cilat e portretizojnë NATO-n në mënyrë të gabuar”, tha Stoltenberg në një video-mesazh për disa media, përfshirë Radion Evropa e Lirë.
Stoltenberg po ashtu tha se dy vendet përpiqen t’i portretizojnë aleatët e NATO-s sikur nuk janë në gjendje “t’i mbrojnë të moshuarit” apo “të punojnë së bashku”.
“Ne jemi duke punuar së bashku. Kjo është saktësisht ajo që po bëjmë”, tha Stoltenberg.
Ai vuri theksin edhe te, siç tha, bashkëpunimi midis aleatëve të NATO-s për sigurimin e mbështetjes mjekësore dhe transferimin e pacientëve.
Javën e kaluar, edhe vëzhguesit e BE-së kanë thënë se kanë identifikuar një "konvergjencë trepalëshe të dezinformimit" për koronavirusin, të promovuar nga Kina, Irani dhe Rusia.
Pjesë e saj ishin rrëfimet se koronavirusi është një armë biologjike e krijuar në Shtetet e Bashkuara për të rrëzuar kundërshtarët dhe se Kina, Irani dhe Rusia "po e luftojnë pandeminë shumë më mirë sesa Perëndimi".