Koreja Jugore nuk regjistron asnjë rast lokal me Covid-19
Ndonëse para pak javësh ka qenë një prej vatrave të përhapjes së koronavirusit të ri, Koreja Jugore në 24 orët e fundit nuk ka regjistruar asnjë rast lokal të infektuar me këtë virus.
Të enjten është raportuar për katër raste të importuara, të gjitha të identifikuara nëpër aeroporte, duke e rritur numrin e të prekurve në këtë shtet në 10,765.
Sipas Qendrës koreane për Parandalimin dhe Kontrollin e Sëmundjeve, kjo është shifra më e vogël e shënuar në dy muaj.
Në kohën e pikut të sëmundjes Covid-19, që shkakton koronavirusi, janë regjistruar qindra raste të reja çdo ditë, duke nxitur autoritetet që të kryejnë një fushatë agresive të testimit, me qëllim të luftimit të këtij virusi.
Orët mësimore larg nxënësve
Si pasojë e përhapjes së koronavirusit, Ministria e Arsimit në Kosovë ka mbyllur shkollat dhe mësimi po zhvillohet në distancë. Njëra nga mësimdhënëset tregon se sa e vështirë është mbajtja e orës pa nxënës.
Vazhdon rritja e numrit të të infektuarve me koronavirus në Gjermani
Gjermania ka regjistruar 1,478 raste të reja me koronavirus në 24 orët e fundit, duke shënuar ditën e katërt që numri i të prekurve është rritur.
Numri total i të infektuarve me këtë virus i është afruar shifrës 160,000 ndonëse rreth 75 për qind e tyre janë shëruar.
Aktualisht është thënë se janë vetëm 34,672 raste aktive.
Numri i të vdekurve që lidhen me sëmundjen Covid-19, që shkakton koronavirusi është rritur për 173, apo në total 6,288.
Autoritetet gjermane kanë nisur të lehtësojnë masat e izolimit javën e kaluar.
Ende nuk është e qartë nëse zyrtarët ia atribuojnë këtij vendimi rritjen e numrit të të prekurve – mirëpo sondazhet tregojnë se shumica e gjermanëve janë kundër përshpejtimit të procesit të kthimit në normalitet.
Luftimi i koronavirusit pa izolim në Suedi
Përderisa shumica e botës ka jetuar për javë të tëra nën kufizime të rrepta të shëndetit publik, Suedia ka luftuar pandeminë e koronavirusit duke mos imponuar izolim të detyrueshëm ose duke mos detyruar bizneset që të mbyllen.
Kufijtë e Suedisë kanë mbetur të hapur. Shkollat për fëmijë nën moshën 16 vjeç janë ende duke mbajtur mësim me fëmijë që shkojnë në klasë.
Baret, restorantet dhe kafenetë mund t’u shërbejnë klientëve për aq kohë sa “tavolinat janë të vendosura siç duhet për të shmangur tollovinë” dhe “njerëzit gjithmonë rrinë të ulur përderisa hanë dhe pinë”.
Floktarët, palestrat, studiot e jogas madje edhe kinematë vazhdojnë të funksionojnë.
Qytetarët janë këshilluar që të udhëtojnë vetëm kur është e nevojshme. Por, nuk ka kufizime në udhëtime masive.
Artikullin e plotë mund ta lexoni në këtë link.