Italianëve u lejohet të dalin në parqe
Në Itali, të hënën (4 maj) fillon zbatimi i masave lehtësuese të izolimit.
Në dy muajt e fundit ky vend ka qenë nën izolim të plotë për shkak të përhapjes së koronavirusit të ri.
Parqet dhe fushat e lojërave do të hapen.
Vrapimi dhe çiklizmi në natyrë do të lejohen, mirëpo njerëzve do t’u duhet të mbajnë një distancë prej të paktën një metër.
Asnjë tubim nuk do të lejohet dhe njerëzit nuk mund të largohen nga rajonet e tyre, përveç në raste urgjence, raporton AFP.
Italia e regjistroi vdekjen e saj të parë në fund të muajit shkurt. Deri më tani nga sëmundja COVID-19 kanë vdekur 28.710 njerëz.
Më shumë se 209,000 u infektuan me koronavirusin e ri, sipas të dhënave nga Universiteti Amerikan Johns Hopkins.
Zyrtarët shëndetësorë udhëzuan qytetarët që të respektojnë masat e tjera sanitare, ndërsa kryeministri italian, Giuseppe Conte, paralajmëroi se masat e kufizimit mund të rikthehen nëse nëse numri i të infektuarve fillon të rritet.
Italianët janë izoluar qysh më 9 mars. Ata janë lejuar të dalin jashtë vetëm për nevoja thelbësore.
Masat e izolimit kanë nisur të lehtësohen pak më 14 prill, me rihapjen e disa dyqaneve të vogla dhe librarive.
Fotogaleri:
Koncert në kohë karantine në lagjet e Shkupit
Vdes një person në konviktet e Qendrës së Studentëve në Prishtinë
Një person ka vdekur në konviktet e Qendrës së Studentëve në Prishtinë.
Lajmin për Radion Evropa e Lirë e ka konfirmuar Policia e Kosovës.
"Rreth orës 17:20 (3 maj), ekipet e emergjencës dhe policia kanë shkuar te Qendra e Studentëve dhe një person është përcjellë me autoambulancë në drejtim të Klinikës Emergjente. Njësitet e policisë dhe ato të forenzikës kanë dalë në vendin e ngjarjes dhe pas procedurave hetimore do të sqarohen rrethanat tjera", ka thënë Daut Hoxha, zëdhënës i policisë.
Ai nuk ka dhënë detaje tjera për rrethanat e vdekjes së këtij personi.
Në bazë të një vendimi të institucioneve të Kosovës, Qendra e Studentëve në Prishtinë është shëndruar në karantinë për personat që hyjnë në Kosovë.
Ky vendim është marrë në kuadër të masave për të parandaluar përhapjen e koronavirusit të ri.
Ministria e Shëndetësisë në Kosovë publikon orarin e ri të lëvizjes së qytetarëve
Ministria e Shëndetësisë në Kosovë ka publikuar orarin e ri të lëvizjes së qytetarëve i cili hyn në fuqi më 4 maj. Qytetarët do të mund të lëvizin më shumë, nga 1.5 orë - sa është koha e lejueshme aktualisht - në 3 orë në dy orare, paradite dhe pasdite.