Dymbëdhjetë pacientë me koronavirus, të shtrirë në QKUK
Klinika Infektive e Qendrës Klinike Universitare të Kosovës (QKUK) njoftoi të martën se në këtë repart janë të shtrirë 12 pacientë me koronavirus.
Në njoftimin për media thuhet se tetë pacientë janë në gjendje stabile, ndërsa katër janë në trajtim me oksigjenoterapi dhe përkujdesje intensive.
Prej tyre, dy janë në gjendje më të rënduar, thuhet në njoftim.
Në Kosovë, gjithsej janë konfirmuar 895 raste me koronavirus.
Prej tyre, 657 pacientë janë shëruar dhe 28 kanë vdekur.
Vendet e varfra, të goditura nga virusi dhe uria
Organizata Botërore e Shëndetësisë ka thënë se nuk duhet nxituar me lehtësimin e masave të izolimit kundër koronavirusit, sepse rihapja mund të rrezikojë një valë të dytë të infeksioneve me COVID-19, sëmundjen që e shkakton koronavirusi.
Kina raporton vetëm për një rast të ri me koronavirus
Kina raportoi vetëm për një rast të ri me koronavirus të martën, krahasuar me 17, një ditë më parë.
Komisioni Kombëtar i Shëndetit tha se rasti i ri në Mongolinë e Brendshme është importuar.
Nga 17 rastet e reja të hënën, pesë kanë qenë në Vuhan, qytetin ku koronavirusi ka shpërthyer vitin e kaluar.
Përpara tyre, Vuhani nuk ka pasur asnjë rast të ri për më shumë se një muaj.
Në total, Kina ka raportuar për mbi 84,000 të infektuar me koronavirus dhe për mbi 4,600 viktima.
Asnjë rast i ri me koronavirus në Zelandën e Re
Zelanda e Re tha se nuk ka shënuar asnjë rast të ri me koronavirus në 24 orët e fundit.
Numri i të infektuarve mbetet 1,497 dhe më shumë se 90 për qind e tyre tashmë janë shëruar.
Autoritetet nuk raportuan as për viktima të reja dhe numri i tyre mbetet 21.
Kryeministrja Jacinda Ardern tha se do të lehtësojë tutje masat e izolimit këtë javë, duke lejuar hapjen e dyqaneve me pakicë, të kinemave, shesheve të lojërave dhe palestrave, megjithëse rregullat e distancimit fizik do të mbeten në fuqi.
Mësimi në shkolla do të rinisë normalisht më 18 maj, ndërsa baret do të lejohen të hapen nga 21 maji, tha Ardern.
Kufijtë do të vazhdojnë të mbeten të mbyllur për vizitorët e huaj.
Për të frenuar përhapjen e koronavirusit, Ardern, në fund të marsit, ka urdhëruar mbylljen e të gjitha aktiviteteve ekonomike, përveç shërbimeve thelbësore.
Më 27 prill, Ardern ka deklaruar se koronavirusi në Zelandën e Re është eliminuar.