Hapen kishat në Greqi
Mijëra grekë janë kthyer në kisha të dielën, pas periudhës së izolimit dhe masave kufizuese të lëvizjes me qëllim të parandalimit të përhapjes së koronavirusit.
Mesha u zhvillua me anë të distancës sociale duke praktikuar rregullat e reja në ruajtjen e shëndetit publik.
Për më shumë se dy muaj, grekët kanë qëndruar në shtëpi duke shënuar edhe Pashkët brenda. Masat e izolimit në Greqi nisën në mes të muajit mars.
Greqia ka shënuar një numër të vogël krahasuar me vendet tjera të të infektuarve me COVID-19. Deri të shtunën, u regjistruan 2,819 raste dhe 162 viktima.
Kina kërkon nga kompanitë të rrisin prodhimin pas rrezikut të valës së dytë të virusit
Kina ka kërkuar nga kompanitë prodhuese të ushqimeve që të rrisin prodhimin e tyre për shkak të rrezikut të një vale të dytë të koronavirusit, që mund të jetë kërcënim për furnizim global.
Kompanive shtetërore dhe private u është kërkuar të rrisin prodhimin në vajëra dhe drithëra.
Një burim, raporton Reuters, ka thënë se Ministria e Tregtisë ka zhvilluar takim me kompanitë për të garantuar se ka rezerva të mjaftueshme gjatë pandemisë.
Por, Ministria e Tregtisë nuk është përgjigjur në pyetjet e dërguara për planet e rritjes së rezervave në këtë periudhë.
Deri më 16 maj, Kina, epiqendra e përhapjes së virusit COVID-19 ka shënuar 82,947 raste me koronavirus.
Hartë në kohë reale për përhapjen e koronavirusit
Kjo hartë tregon përhapjen e koronavirusit sipas të dhënave të Universitetit Johns Hopkins, Organizatës Botërore të Shëndetësisë dhe Worldometers.info. Të dhënat e tyre bazohen në informacionet e ofruara nga qeveritë. Në shumë shtete, ka kufizime në publikimin e këtyre informacioneve apo ka arsye përse nuk mund të tregohet në mënyrë të drejtë situata reale.
Hartën mund ta shikoni këtu.
Brazili, vendi i katërt në botë me më së shumti raste të infektuara
Brazili ka shënuar rritje të rasteve me koronavirus të shtunën, duke kaluar Italinë dhe Spanjën që ishin epiqendra e virusit në Evropë.
Ministria e Shëndetësisë në Brazil ka regjistruar 14,919 raste të reja në 24 orë duke e çuar numrin total në 233,142 raste. Sipas statistikave, Brazili ka numrin më të madh të rasteve pas Shteteve të Bashkuara, Rusisë dhe Britanisë.
Numri i testimeve të kryera në Brazil është ende shumë larg nga shtetet tjera evropiane.
Ndërkaq, Italia dhe Spanja kanë kryer 1.9 milion teste për koronavirusin. Ministria e Shëndetësisë në Brazil të shtunën raportoi për 816 viktima të reja nga virusi, ndërkaq numri total ka rritur në 15,633.