Mes urrejtjes dhe pamundësisë për integrim

Muajve të fundit kanë ndodhur disa sulme fizike ndaj qytetarëve të komuniteteve joshumicë në Kosovë. Rasti më i fundit është rrahja e një vajze tetëvjeçare egjiptiane nga një 29-vjeçar në fshatin Gurrakoc të Istogut. Më herët, një fëmijë 12-vjeçar rom u gjet i vdekur pasi ishte abuzuar seksualisht, ndërkohë që një grua rome u rrah dy herë publikisht, në Lipjan dhe Ferizaj. Qytetarët e komuniteteve Rom, Ashkali dhe Egjiptian thonë se janë pre e urrejtjes dhe se askush s’po i ndihmon për ta kaluar këtë situatë.