Drejtpërdrejt Tre avionë luftarakë amerikanë rrëzohen në Kuvajt, dyshohet për goditje aksidentale

Presidenti i Iranit, Masud Pezeshkian, emëroi gjeneralin e Korpusit të Gardës Revolucionare Islamike (IRGC), Majid Ebnolreza, ministër të përkohshëm të Mbrojtjes.

Më herët, ai shërbente si zëvendësministër kryesor i Aziz Nasirzadehut, i cili u vra në një sulm izraelit, më 28 shkurt.

"Me urdhër të presidentit Pezeshkian, gjenerali i brigadës, Seyyed Majid Ebnolreza, është emëruar ministër i përkohshëm i Mbrojtjes", shkroi Mohammad Mehdi Tabatabaei, nga zyra për komunikim e Pezeshkianit, në rrjetet sociale.

Një zëdhënës i Qeverisë qipriote tha se dy dronë që po shkonin drejt bazës britanike RAF Akrotiri në Qipro, janë kapur.

Njoftimi vjen pasi një dron iranian u rrëzua në bazën ushtarake britanike mbrëmë, "duke shkaktuar dëme të vogla materiale".

Më herët, avionët luftarakë britanikë u ngritën në ajër, pasi sirenat e rrezikut u aktivizuan.

Një mesazh i dërguar nga baza për punonjësit paralajmëroi për "kërcënim të vazhdueshëm të sigurisë" dhe u bëri thirrje njerëzve që të ktheheshin në shtëpi dhe të qëndronin brenda deri në njoftimin e radhës.

Sipas informacioneve nga terreni, ministri i Brendshëm qipriot ka udhëzuar kryetarin e bashkisë së Kourionit, pranë bazës britanike, që të vazhdojë me një "evakuim të detyrueshëm".

Forcat Mbrojtëse të Izraelit (IDF) thanë se kanë "filluar një sulm të gjerë shtesë" në kryeqytetin iranian, Teheran.

Ky sulm ka në shënjestër "objektiva të regjimit terrorist iranian".

SHBA-ja njoftoi se tre avionë të saj luftarakë F-15 janë rrëzuar në Kuvajt.

Dyshohet se ata janë goditur gabimisht nga forcat aleate, të cilat po mbështesnin Operacionin e SHBA-së, Tërbimi Epik, në Iran.

Në njoftimin e Komandës Qendrore të SHBA-së thuhet se "gjatë luftimeve aktive - që përfshinin sulme nga avionë iranianë, raketa balistike dhe dronë - avionët luftarakë të Forcave Ajrore të SHBA-së u qëlluan gabimisht nga mbrojtja ajrore e Kuvajtit".

Të gjashtë pjesëtarët e ekuipazhit u hodhën me parashutë dhe shpëtuan.

Shkaku i incidentit është nën hetim.

Më herët, një zëdhënës i Ministrisë së Mbrojtjes së Kuvajtit tha se disa avionë ushtarakë amerikanë u rrëzuan mëngjesin e së hënës në territorin e këtij vendi, por se pilotët dhe ekuipazhet shpëtuan.

Autoritetet nisën menjëherë operacionet e kërkim-shpëtimit, ndërsa ekuipazhet u evakuuan dhe u dërguan në spital për kontrolle shëndetësore dhe trajtim të nevojshëm.

Zëdhënësi shtoi se ka pasur koordinim të drejtpërdrejtë me forcat amerikane për detajet e incidentit dhe se janë marrë disa masa të përbashkëta teknike.

Edhe sipas tij, autoritetet po vazhdojnë të hetojnë, për të përcaktuar shkakun e rrëzimit.