Abdixhiku: LDK do të jetë zë i arsyes dhe i stabilitetit institucional në Kuvend
Kryetari i Lidhjes Demokratike të Kosovës, Lumir Abdixhiku, tha se deputetët e LDK-së dhanë betimin e tyre në Kuvendin e Republikës së Kosovës, duke marrë përgjegjësi përpara qytetarëve dhe Kushtetutës.
Abdixhiku theksoi se përfaqësuesit e LDK-së do të nisin mandatin e tyre me përkushtim ndaj ligjshmërisë, demokracisë dhe interesit publik.
“LDK do të jetë zë i arsyes, i stabilitetit institucional dhe i shtetit funksional, në shërbim të Kosovës dhe qytetarëve të saj, në Kuvend dhe jashtë tij”, shkroi Abdixhiku në një postim në rrjetet sociale.
Në pritje të seancës për votimin e Qeverisë së re...
Kuvendi i Kosovës pritet të mblidhet së shpejti në një seancë të re për votimin e Qeverisë së re të Republikës së Kosovës.
Lëvizja Vetëvendosje, si fituese e zgjedhjeve të 28 dhjetorit, bëri të ditur se ka dorëzuar te presidentja Vjosa Osmani propozimin për caktimin e Albin Kurtit si mandatar për formimin e qeverisë.
Deri tani, presidentja Osmani nuk ka dhënë ndonjë reagim të drejtpërdrejtë për këtë propozim; ajo vetëm ka uruar Albulena Haxhiun për zgjedhjen në krye të Kuvendit dhe ka bërë thirrje për bashkëpunim institucional.
Qëndroni me Radion Evropa e Lirë!
Begaj uron Haxhiun për zgjedhjen në krye të Kuvendit të Kosovës
Presidenti i Shqipërisë, Bajram Begaj, uroi Kuvendin e Republikës së Kosovës për nisjen e punimeve në legjislaturën e dhjetë, si dhe Albulena Haxhiun për zgjedhjen e saj në postin e kryetares së Kuvendit.
Përmes një mesazhi në Facebook, Begaj shprehu mbështetjen e Shqipërisë për institucionet demokratike të Kosovës dhe theksoi se Tirana do të vazhdojë të qëndrojë pranë Prishtinës në rrugëtimin e saj euroatlantik.
Për ju që sapo na jeni bashkuar:
- Kuvendi i Kosovës u konstituua më 11 shkurt me zgjedhjen e kryetares Albulena Haxhiu dhe pesë nënkryetarëve: Ardian Gola, Vlora Çitaku, Kujtim Shala, Sllavko Simiq dhe Emillija Rexhepi.
- Në fjalimin e saj të parë, Haxhiu tha se do të sigurojë funksionim me dinjitet të Kuvendit, në përputhje me ligjet dhe Kushtetutën.
- Presidentja Vjosa Osmani bëri thirrje për bashkëpunim konstruktiv dhe një Kuvend plotësisht funksional, në shërbim të shtetit të së drejtës dhe agjendës euroatlantike.
- Sonte pritet të mbahet edhe një seancë tjetër për votimin e Qeverisë.
- Lëvizja Vetëvendosje ka dorëzuar te presidentja propozimin për caktimin e Albin Kurtit si mandatar për formimin e Qeverisë së re.