Asnjë votë për Verica Qeraniqin
Kryetari Dimal Basha e ka hedhur në votim emrin e Verica Qeraniqit për pozitën e nënkryetares nga pakicat serbe, mirëpo ajo nuk e ka siguruar asnjë votë.
Në sallë kanë qenë 94 deputetë.
Lista Serbe refuzon të marrë pjesë në hedhjen e shortit
Pavarësisht refuzimit të Listës Serbe që të marrë pjesë në hedhjen e shortit për të zgjedhur nënkryetarin serb, kryetari i Kuvendit, Dimal Basha e ka vazhduar procedurën.
Ai ka thënë se emri i secilit deputet që del nga shorti do të votohet dhe duhet t’i sigurojë 61 vota për t’u zgjedhur nënkryetar.
Lulzim Peci: Loja që u zhvillua në KQZ po vazhdon në Kuvendin e Kosovës
Lulzim Peci, nga Instituti Kosovar për Kërkime dhe Zhvillim të Politikave (KIPRED) në Prishtinë, shkroi në Facebook se edhe nëse Nenad Rashiq zgjidhet nënkryetar, “ka shumë gjasa që Gjykata Kushtetuese të konstatojë se Kuvendi sot nuk është konstituar ligjërisht”.
Sipas tij, loja që u zhvillua në KQZ, kur u votua të mos certifikohet Lista Serbe për zgjedhjet lokale, po vazhdon në Kuvendin e Kosovës, “dhe kjo, për mobilizimin e militantëve në prag të zgjedhjeve lokale”.
“Mbi të gjitha, patriotizmi — pa të cilin kjo fjalë, që tashmë “shitet lirë”, nuk ka kuptim — është, para së gjithash, respektimi i ligjeve dhe i Kushtetutës së vendit; gjithçka tjetër është vetëm populizëm i lodhur. Kjo vlen për të gjithë deputetët e Kuvendit të Kosovës, veçanërisht për kryetarin e sapozgjedhur, Basha”.
Albert Krasniqi: Procedura për zgjedhjen e dy nënkryetarëve që përfaqësojnë komunitetet joshumicë duhet të përsëritet
Albert Krasniqi nga organizata Demokraci Plus në Prishtinë ka thënë përmes një postimi në Facebook se procedura për zgjedhjen e dy nënkryetarëve të Kuvendit që përfaqësojnë komunitetet joshumicë duhet të përsëritet, pasi mënyra e ndjekur nuk është në përputhje me Kushtetutën.
“Zgjedhja e tyre duhet të bëhet me një votim të vetëm, në bllok, për të dy kandidatët.
Kandidati për nënkryetar nga komuniteti serb mund të propozohet vetëm nga Lista Serbe, e cila përfaqëson shumicën e deputetëve të këtij komuniteti, dhe jo nga subjekte të tjera politike”.
Sipas Krasniqit, aktivizimi i procedurës me short për përzgjedhjen e kandidatit mund të bëhet vetëm në rastet kur nuk ka propozime dhe gjithmonë në prani të deputetëve të komunitetit përkatës. Pa pjesëmarrjen e tyre, shorti nuk mund të zhvillohet.
Mes tjerash, Krasniqi ka thënë se skenari për të shteruar kandidaturat e Listës Serbe me qëllim që pozita t’i kalojë ZSPO-së së Nenad Rashiqit, nuk mund të realizohet pa miratimin e shumicës së deputetëve të këtij komuniteti.