Hamza kërkon që deputetët të votojnë njëzëri
Kryetari i PDK-së, Bedri Hamza, u bëri thirrje deputetëve që të kenë qëndrim të përbashkët në votimin e ndryshimeve në Ligjin për Dhomat e Specializuara.
“Ju lus, deputetë, që të kemi qëndrim unik në votimin e këtij projektligji”, tha Hamza.
Ai tha se nisma nuk duhet të shihet si ligj i PDK-së dhe as si çështje që prek vetëm mandatin e këtij Kuvendi.
Ushtarë të UÇK-së ka në të gjitha partitë e Kosovës, prandaj është vlerë përtej një subjekti politik, tha Hamza.
Lushaku-Sadriu: Nisma mund të mos prodhojë efekt juridik
Deputetja e LDK-së, Jehona Lushaku-Sadriu, tha se për partinë e saj lufta e UÇK-së “ka qenë e shenjtë”, por ngriti pikëpyetje për efektin juridik të ndryshimeve të propozuara në Ligjin për Dhomat e Specializuara.
Ajo tha se miratimi i ndryshimeve nga Kuvendi nuk garanton zbatimin e tyre.
“Kjo nismë mund të mos prodhojë efekt juridik”, tha Lushaku-Sadriu, duke paralajmëruar se pasojat mund t’i mbeten shtetit të Kosovës.
Sipas saj, për LDK-në, rruga për ndryshimin e një aktgjykimi të Dhomave të Specializuara është ajo gjyqësore, përmes procesit të apelit.
LDK: Nuk mund të bëhemi pjesë e kësaj nisme
Deputetja e LDK-së, Jehona Lushaku-Sadriu, tha se partia e saj nuk mund të bëhet pjesë e nismës për ndryshimin e Ligjit për Dhomat e Specializuara.
Ajo u bëri thirrje deputetëve që, gjatë votimit, të veprojnë “në interes të drejtësisë”.
“Për LDK-në, lufta e UÇK-së është e shenjtë”, tha Lushaku-Sadriu.
Ajo argumentoi se miratimi i ndryshimeve nga Kuvendi nuk garanton zbatimin e tyre dhe se nisma “mund të mos prodhojë efekt juridik”.
Haradinaj: Aleanca e voton projektligjin
Ramush Haradinaj nga Aleanca tha se partia e tij do t’i votojë ndryshimet në Ligjin për Dhomat e Specializuara.
Sipas Haradinajt, anulimi i Dhomave të Specializuara “do të ishte përgjigjja e drejtë për fyerjen që na është bërë”, por Aleanca do ta mbështesë nismën që është sot para Kuvendit.
Ai kërkoi që projektligji të votohet sot edhe në lexim të dytë.
“Rrugëtimin tonë deri këtu e kemi bërë edhe me gabime, por fajin duhet ta gjejmë te vetja, sepse vetëm ne mbajmë përgjegjësi për fatin dhe të vërtetën tonë”, tha Haradinaj.
