Shkon në tre numri i të infektuarve me koronavirus në Kosovë
Ministri i Shëndetësisë i Kosovës, Arben Vitia, konfirmoi të shtunën se numri i të infektuarve me koronavirus në Kosovë ka arritur në tre.
Të premten u konfirmuan dy rastet e para me koronavirus në Kosovë.
“Sapo janë identifikuar rastet e para me koronavirusin, qeveria ka marrë masa të reja. Sot, në këtë konferencë, me keqardhje ju njoftoj për një rast të ri. Bëhet fjalë për një të afërm të pacientit nga Stublla e Vitisë që u konfirmua dje me Covid-19”, tha Vitia.
Dy pacientët e konfirmuar të premten, janë një 77 vjeç dhe një 20 vjeçe, ndërsa i treti është 39 vjeç.
Naser Ramadani, nga Instituti Kombëtar i Shëndetësisë Publike, tha se gjendja e tyre është stabile.
Prishtina në ditët e koronavirusit
Autoritetet në Kosovë konfirmuan më 13 mars dy raste pozitive me koronavirusin e ri.
Vetëm një ditë pas, rrugët e Prishtinës duken të boshatisura dhe ata pak persona që kanë dalë, kanë vendosur maska mbrojtëse.
Koronavirusi ‘zbraz’ Prishtinën
“Nuk është valë, është cunami”
Kështu ka deklaruar mjeku Roberto Rona, i cili po kujdeset për të prekurit me koronavirus në një spital të qytetit Monza të Italisë.
“Është diçka që ju bën të ndryshoni krejtësisht mënyrën se si udhëheqni me spitalin”, ka thënë ai.
Italia është vendi i goditur më së keqi në Evropë nga koronavirusi.
Aktualisht ka 17,660 njerëz të infektuar, 1,266 të vdekur dhe 1,439 të shëruar.
Një ekip i ekspertëve kinezë ka arritur në Itali të premten mbrëma për t’i ndihmuar autoritetet atje në trajtim e krizës.
Zbrazet Praga
Shkolla, bare, restorane të mbyllura... Nga e hëna edhe kufij të mbyllur. Këto janë masat e Republikës Çeke për luftimin e koronavirusit.
Kryeministri çek, Andrej Babis, ka shpallur gjendjen e jashtëzakonshme më 12 mars.
Çekia ka 141 raste të konfirmuara me koronavirus.
Praga, një ndër qytetet me numrin më të madh të turistëve në Evropë, duket kështu këto ditë:
Praga në ditët e koronavirusit