Udhëheqësit italianë nervozohen me qytetarët që nuk qëndrojnë në shtëpi
Kryetarët e qyteteve dhe rajoneve të ndryshme në Itali janë nervozuar shumë keq me qytetarët që nuk po i respektojnë masat e kërkuara nga qeveria për të qëndruar në shtëpi.
Italia është duke kaluar nëpër një kohë të vështirë pasi ka numrin më të madh në botë të personave që kanë vdekur nga koronavirusi.
Edhe 683 viktima në Itali
Gjatë 24 orëve të fundit në Itali u shënuan 683 viktima nga koronavirusi, njoftuan autoritetet shëndetësore.
Shifra paraqet një rënie të ulët në krahasim me 743 viktimat e regjistruara një ditë më parë, por ajo e çon në 7,503 numrin e të vdekurve në këtë vend, si pasojë e sëmundjes COVID-19, të shkaktuar nga koronavirusi.
Në 24 orët e fundit u regjistruan edhe 5,210 raste të të infektuarve të rinj.
Italia, me mbi 74,380 të infektuar në total, ka numrin më të madh të pacientëve pas Kinës - vendit të origjinës së koronavirusit.
Por, Italia ka numrin më të madh të viktimave; pas saj vjen Spanja dhe më pas Kina.
Massimo Galli, mjek në një spital të Millanos, ka thënë se rastet pozitive këto ditë janë prekur përpara se të ndërmerreshin masa më të ashpra të izolimit, më 11 mars.
Qytetarët e Tuzit pranojnë izolimin
Në ditën e parë prejse autoritetet në Mal të Zi kanë urdhëruar karantinë pa kushte për qytetarët e Komunës së Tuzit, rrugët e këtij qyteti janë zbrazur.
Të martën mbrëma, autoritetet komunale dhe shtetërore kanë urdhëruar izolim total, pas konfirmimit të 15 rasteve me koronavirus në Tuz.
“Nuk mund të dalim jashtë, pos në kopshtin tonë. Për të gjitha që na duhen, kemi numrin kontaktues të komunës. Ne u japim listën, ata na i sjellin furnizimet në shtëpi. Askush nuk shkon në punë”, tha një qytetare e Tuzit për Radion Evropa e Lirë, emri i së cilës është i njohur për redaksinë.
Në hyrje të Komunës së Tuzit ndodhen edhe patrullat e policisë.
“Duke u izoluar të gjithë mund ta parandalojmë përhapjen e koronavirusit, mund të mbrojmë të rinjtë dhe të moshuarit. E kemi edhe mbështetjen e shtetit”, ka thënë kryetari i Tuzit, Nik Gjeloshaj.
Mali i Zi ka konfirmuar 53 raste të të infektuarve me koronavirus, ndërsa një pacient e ka humbur jetën.
Edhe tetë raste të reja me koronavirus në Kosovë
Autoritetet në Kosovë njoftuan të mërkurën se tetë persona të testuar për koronavirus, kanë dalë pozitivë.
Instituti Kombëtar i Shëndetësisë Publike tha se në total janë testuar 34 vetë.
Në komunikatën e tij për media thuhet se katër nga të infektuarit e rinj janë me vendbanim në fshatin Domanek, Malishevë, tre në Prishtinë dhe një në fshatin Studime e Ulët, Vushtrri.
Shifra e fundit e çon në 71 numrin e të infektuarve në Kosovë.
Më 22 mars, Kosova ka regjistruar edhe viktimën e parë nga koronavirusi.