Banka Botërore parasheh rënie të ekonomisë në Kosovë
Banka Botërore ka paraparë rënie të ekonomisë në Kosovë prej 4.5 për qind në vitin 2020, për shkak të sëmundjes COVID-19, që shkakton koronavirusi i ri.
Megjithatë ajo ka thënë se mund të ketë rikthim të rritjes më 2021.
Në raportin e publikuar të mërkurën është thënë se “Banka Botërore është duke finalizuar një program aktivitetesh, që mund të tejkalojë 120 milionë euro, për të mbështetur Kosovën në menaxhimin dhe zbutjen e ndikimit të koronavirusit”.
Ky program përfshin mes tjerash një projekt të ri me procedura të përshpejtuara për t’iu përgjigjur prioriteteve urgjente të sektorit të shëndetësisë dhe për të mbrojtur të ardhurat e ekonomive familjare.
“Banka Botërore është e përkushtuar të mbetet partner i fortë për Kosovën gjatë këtyre kohërave të vështira dhe ekipet tona po punojnë për t’i ndihmuar Kosovës për t’iu përgjigjur sa më shpejt krizës së COVID-19”, ka thënë, Marco Mantovanelli, menaxher i Bankës Botërore për Kosovën.
“Pas aprovimit nga Banka Botërore, është i nevojshëm nënshkrimi i shpejtë i marrëveshjes nga Qeveria si dhe ratifikimi nga Kuvendi për të siguruar që fondet janë në dispozicion për të përfituar Kosova dhe qytetarët e saj”, ka thënë mes tjerash ai.
Sipas këtij raporti, shpërthimi i pandemisë me koronavirus dhe masat e nevojshme të frenimit të saj janë duke shkaktuar presion të paparë për investimet, konsumin privat, por edhe për eksportet dhe remitancet nga diaspora.
Raporti i fundit përqendrohet në ndikim makroekonomik të këtij virusi në vendet e Ballkanit Perëndimor.
Marrë parasysh të dhënat e fundit, në Kosovë deri më tani janë regjistruar 790 persona të infektuar, 232 të shëruar dhe 22 të vdekur, si pasojë e koronavirusit të ri.
Ndryshon gara për çmimet filmike Oscars
Filmat e shfaqur online do të mund të garojnë në ceremoninë e vitit të ardhshëm të çmimeve Oscar, ka njoftuar Akademia e Arteve dhe Shkencave në Hollywood.
Këto ndryshime janë bërë për shkak të shpërthimit të koronavirusit të ri.
Deri më tani, vetëm filmat që janë shfaqur nëpër kinema për të paktën një javë në Llos Angjelles kanë pasur mundësi të garojnë.
Mirëpo meqë pandemia me koronavirus ka ndikuar në mbylljen e kinemave në gjithë botën, një numër i filmave janë transmetuar nëpër platforma online.
Presidenti, David Rubin dhe shefja ekzekutive, Dawn Hudson kanë thënë: “Akademia beson se nuk ka mënyrë më të mirë për të përjetuar magjinë e filmave sesa kur ata shfaqen në kinema. Përkushtimi ynë ndaj kësaj teorie është i pandryshuar dhe palëkundur. Megjithatë, pandemia tragjike me sëmundjen Covid-19mn (që shkakton koronavirusi) ka krijuar nevojën e këtij përjashtimi të përkohshëm”.
Rregullat tradicionale është thënë se do të rikthehen sapo të përfundojë pandemia.
Filmi jugkorean, Parasite ka fituar çmimin për filmin më të mirë këtë vit të Akademisë, duke u bërë filmi i parë që nuk është gjuhën angleze, por ka marrë Oscar në këtë kategori.
Ky film shpërfaq satirën sociale rreth dy familjeve nga klasa të ndryshme shoqërore në Seul, njëra që jeton në varfëri në bodrum dhe një familje të pasur që jeton në një shtëpi të madhe.
Mbajtja e Lojërave Olimpike, “e vështirë nëse nuk ndalet pandemia”
Kryeministri japonez, Shinzo Abe ka thënë se do të jetë e vështirë mbajtja e Lojërave Olimpike Verore vitin e ardhshëm nëse nuk ndalet pandemia.
Kjo ngjarje fillimsht ishte planifikuar të mbahej këtë vit, mirëpo është shtyrë për korrikun e vitit 2021.
Megjithatë prej tani ekzistojnë dilema nëse Lojërat do të zhvillohen edhe në datën e re.
“Ne kemi thënë se Lojërat Olimpike dhe ato Paraolimpike duhet të mbahen në formatin komplet, ashtu që të gjithë atletët dhe spektatorët të marrin pjesë në mënyrë të sigurt”, ka thënë Abe.
“Do të ishte e pamundshme mbajtja e Lojërave në formatin komplet nëse nuk ndalet pandemia”.
Ai ka thënë se Lojërat Olimpike “duhet të mbahen në një mënyrë që tregon se bota ka fituar betejën me pandeminë. Përndryshe do të jetë shumë e vështirë mbajtja e tyre”.
Japonia deri më tani ka regjistruar 13,895 persona të infektuar dhe 413 të vdekur si pasojë e sëmundjes Covid-19, që shkakton koronavirusi.
Vietnami i kthehet “normales së re”
Ka kaluar rreth një javë prej kur Vietnami ka lehtësuar masat e izolimit kombëtar dhe jeta ka filluar gradualisht t’i kthehet normales.
Ndalesat nga plastika gjatë ngrënies së darkës, distancimi fizik në tregjet e rrugës dhe vendosja e detyrueshme e maskave janë kthyer në “normalen e re”.
Vietnami është një prej vendeve që është përshëndetur për suksesin në të përballurit me virusin.
Pavarësisht pse ndan kufirin me Kinën dhe ka popullsi prej 97 milionë banorëve, deri më tani në këtë vend janë regjistruar vetëm 270 raste të prekura me këtë virus, dhe asnjë vdekje.
Autoritetet kanë mbyllur kufijtë nga fillimi i muajit janar, kanë ndjekur në mënyrë agresive të prekurit dhe kanë nisur fushatë kombëtare të informimit.
Disa prej masave nuk kanë qenë shumë pozitive, sikurse ato të inkurajimit të vëzhgimit të fqinjve.