Shtatë raste të reja me COVID-19 në Kosovë
Kosovës i janë shtuar edhe shtatë raste më COVID-19 duke e çuar numrin e përgjithshëm të të infektuarve në 985.
Kështu ka njoftuar të dielën, Instituti Kombëtar i Shëndetësisë Publike.
"Rastet pozitive janë raste kontakti nga: komuna e Ferizajit 5 raste (sipas vendbanimit: 4 raste Ferizaj dhe 1 rast Balaj) dhe me nga 1 rast vendbanimet: Gjilan dhe Prishtinë", thuhet në njoftimin e Institutit.
Gjatë 24 orëve të fundit janë shëruar edhe 23 pacientë që kanë qenë të infektuar me koronavirusin e ri, që e shkakton sëmundjen COVID-19.
"Numri i përgjithshëm i të shëruarve deri më sot është gjithsej 736 raste", bën të ditur Instituti.
Deri më tani në Kosovë nga COVID-19 kanë vdekur 29 pacientë, të cilët kanë pasur edhe sëmundje të tjera shoqëruese.
Kryeministri në detyrë i Kosovës, Albin Kurti, ka njoftuar nga 18 maji, në Kosovë do të fillojë zbatimi i fazës së dytë të lehtësimit të masave të vendosura në kuadër të luftimit të pandemisë së koronavirusit.
Kurti ka thënë ky vendim është marrë pas rekomandimit të Institutit Kombëtar të Shëndetësisë Publike në Kosovë.
“Nga e hëna do të rihpahen këto biznese: floktarët dhe sallonet e ondulimit, stomatologët dhe fizioterapeutët, tregtarët me pakicë dhe tregu i gjelbër, gastronomia, pra varianti ‘merre me vete’, transporti hekurudhor, transporti urban dhe ndërurban me leje të veçanta, qendrat e thirrjeve telefonike me lista të stafit esencial, si dhe galeritë dhe muzetë”, ka deklaruar Kurti.
Ai tha se për shkak të rrezikut nga përhapja e koronavirusit, do të vazhdohet me një orar të kufizimit të lirisë së lëvizjes.
Qytetarët do të kenë mundësi që të dalin dy herë në ditë, nga dy orë, varësisht nga numri i fundit në letërnjoftim.
Dënime me burgim nëse banorët nuk e vendosin maskën mbrojtëse
Kuvajti dhe Katari njoftuan se personat që nuk i vendosin maskat mbrojtëse do të burgosen ose do të gjobiten me mijëra dollarë.
Ministria e Shëndetësisë në Kuvajt tha se kushdo që nuk e vendos maskën do të dënohet me tre muaj burg, ndërsa televizioni shtetëror i Katarit raportoi se dënimi maksimal do të ishte tre vjet.
Në Kuvajt gjoba më e lartë në të holla, do të jetë 16.200 dollarë dhe në Katar 55,000 dollarë.
Gjashtë shtetet e Gjirit, kanë raportuar gjithsej më shumë se 137.400 raste të të infektuarve me koronavirusin e ri dhe 693 vdekje.
Rastet në rajon fillimisht ishin të lidhura me udhëtimet, por më vonë ndodhi një përhapje në mesin e punëtorëve migrantë.
Arabia Saudite, me një popullsi prej rreth 30 milionë njerëz, ka numrin më të lartë të personave me COVID-19, më shumë se 54,700 raste dhe 312 vdekje.
Katari, me rreth 2.8 milionë, është në vendin e dytë me 32,600 raste dhe 15 vdekje.
Emiratet e Bashkuara Arabe kanë raportuar më shumë se 23 mijë raste dhe 220 vdekje.
A duhet të zbatohen dënimet e vendimeve jokushtetuese?
Atdhe Behrami, është pronar i një furre të bukës në Mitrovicë të Jugut, i cili nuk e ka ndalur punën edhe gjatë pandemisë së COVID-19, që ka përfshirë edhe Kosovën.
Ai për Radion Evropa e Lirë ka treguar se ndaj tij është iniciuar rast nga Policia e Kosovës, për shkelje të masave kundër COVID-19, të vendosura nga Ministria e Shëndetësisë.
Ky furrtar ka treguar shkeljet që i kishte bërë e për të cilat i është dashur të përballet me policinë.
Artikullin e plotë mund ta lexoni në këtë link.
Infografikë:
Punëtorët që do të përfitojnë nga pakoja emergjente e qeverisë
