Hong Kongu regjistron numrin më të madh të rasteve brenda një dite
Territori kinez i Hong Kongut ka regjistruar 48 raste të reja me koronavirus, që është shifra më e lartë brenda një dite në këtë vend.
Ekspertët shëndetësorë kanë paralajmëruar për rrezik nga një shpërthim tjetër i sëmundjes, për shkak të njerëzve që kthehen nga jashtë vendit.
“Kjo është koha më e keqe për t’u relaksuar, sepse jemi në rrezikun më të lartë që nga shpërthimi”, tha profesori Habriel Leung, dekan i fakultetit mjekësor të Universitetit të Hong Kongut, raporton BBC.
Hong Kongu ka 208 njerëz të infektuar me koronavirus, ndërsa katër pacientë atje kanë humbur jetën.
Koronavirusi është shfaqur për herë të parë në qytetin Vuhan të Kinës në fund të vitit të kaluar dhe, që atëherë, është përhapur në mbi 150 vende të botës.
Bavaria kufizon lëvizjet e njerëzve
Bavaria është bërë landi i parë gjerman që ka vënë kufizime të gjera në lirinë e lëvizjes, me qëllim frenimin e përhapjes së koronavirusit.
Kryeministri i landit, Markus Soeder, tha se, nisur nga e shtuna, qytetarët do të mund të dalin nga shtëpia vetëm për të shkuar në punë, për blerje, për vizita te mjeku ose në farmaci, për të ndihmuar të tjerët ose për të vizituar prindërit.
Aktivitetet sportive jashtë do të vazhdojnë të lejohen, por vetëm nga një njeri i vetëm ose një grup njerëzish të së njëjtës familje.
Gjermania ka mbi 16,200 njerëz të infektuar me koronavirus.
Dyzetekatër pacientë atje kanë humbur jetën.
Në Serbi shpallet epidemi e koronavirusit
Ministri i Shëndetësisë i Serbisë, Zllatibor Llonçar, nxori një dekret për shpalljen e epidemisë së koronavirusit në Serbi.
Dekreti vlen për gjithë territorin e këtij vendi.
Serbia ka 118 njerëz të infektuar me koronavirus.
Rasti i parë atje është raportuar më 6 mars.
Më 15 mars, autoritetet serbe kanë shpallur gjendje të jashtëzakonshme për shkak të koronavirusit.
NASA mbyll dy qendra për shkak të koronavirusit
NASA do t’i mbyllë dy qendra të saj hapësinore, për të ndihmuar në parandalimin e përhapjes së koronavirusit.
Agjencia amerikane e hapësirës tha se do të pezullojë punën në objektin Michoud, në shtetin Nju Orllins, ku po ndërtohet Sistemi i Nisjes në Hapësirë.
Qendra Stennis Space në Misisipi, ku po testohet përforcuesi i raketave, gjithashtu do të mbyllet përkohësisht.
Për rrjedhojë, këta hapa mund të shtyjnë misionin e NASA-s për të dërguar astronautë në Hënë, në vitin 2024.
Shtetet e Bashkuara kanë mbi 14,000 njerëz të infektuar me koronavirus, përfshirë edhe një rast të ditur në Qendrën Stennis Space në NASA.
Në SHBA, 250 pacientë kanë humbur jetën nga sëmundja.