Radio-stacionet në Evropë transmetojnë këngën e Liverpool-it
Radio-stacionet në Evropë kanë transmetuar të premten himnin e tifozëve të klubit anglez të futbollit, Liverpool.
“You'll Never Walk Alone” (Ti nuk do të ecësh vetëm kurrë) është transmetuar nga 180 radio-stacione në Evropë, mëngjesin e sotëm, raporton BBC.
Kjo është parë si mesazh i solidaritetit në kohën kur miliona njerëz janë të vetizoluar në shtëpi, për shkak të pandemisë së koronavirusit.
Sipas Organizatës Botërore të Shëndetësisë, kontinenti evropian është epiqendër e kësaj pandemie.
Vendet e prekura më së keqi në Evropë janë Italia dhe Spanja.
Dërgohen në karantinë 96 kosovarët e kthyer nga Gjermania
Rreth 96 shtetas të Kosovës janë kthyer të premten nga Duseldorfi i Gjermanisë në Kosovë.
Për shkak të situatës së krijuar pas përhapjes së koronavirusit të ri, të gjithë të kthyerit janë dërguar në Qendrën e Studentëve në Prishtinë, e cila së fundmi, me kërkesë të Qeverisë së Kosovës, është shndërruar në karantinë.
Lajmin për kthimin e tyre e ka konfirmuar për Radion Evropa e Lirë, Alban Zogaj shef i kabinetit në ministrinë e Transportit dhe Infrastrukturës.
Deri më tani Kosova ka raportuar për 22 persona të infektuar me koronavirus.
BE-ja përgëzon qeverinë për masat e marra kundër koronavirusit
Shefja e Zyrës së Bashkimit Evropian në Prishtinë, Nataliya Apostolova ka thënë se BE-ja do t’i ndihmojë Kosovës për të kaluar atë që e ka cilësuar si periudhë të vështirë, pas përhapjes së koronavirusit.
Përmes një postimi në rrjetin social, Twitter, Apostolova, ka thënë se ka zhvilluar bisedë telefonike me ministrin e Shëndetësisë në Kosovë, Arben Vitia.
Përgjatë bisedës, shefja e zyrës së BE-së në Prishtinë, është thënë të ketë përgëzuar ministrin Vitia dhe qeverinë për masat që kanë marrë deri më tani me qëllim të parandalimit të përhapjes së koronavirusit të ri.
Deri më tani në Kosovë është raportuar për 22 persona të prekur me këtë sëmundje.
Shënohet viktima e parë nga koronavirusi në Serbi
Një burrë 59-vjeçar ka humbur jetën si pasojë e koronavirusit në Qendrën Klinike të Vojvodinës, ka bërë të ditur kryeministrja serbe, Ana Bërbaniq.
"Ai e ka marrë virusin nga një person, djali i të cilit ka qenë në Milano”, ka thënë ajo, e cila në emër të Qeverisë dhe shtetit të Serbisë i ka shprehur ngushëllime familjes së viktimës.
Bërnabiq po ashtu bëri të ditur se në Serbi janë regjistruar edhe 32 rastet të reja të të infektuarve, duke çuar në 135 numrin total.
Sipas saj, në izolim shtëpiak janë 64 persona ndërsa tetë janë duke u trajtuar me ndihmën e respiratorëve.
“Ekipet tona mjekësore po luftojnë për jetën e atyre tetë pacientëve”, ka thënë Bërnabiq.