"Mbyllet" Britania e Madhe
Kryeministri britanik, Boris Johnson ka marrë vendim për “mbyllje” të Britanisë së Madhe nga dita e premte, pasi ka urdhëruar, baret, restorantet, kinematë dhe palestrat që të mbyllin dyert, me qëllim të parandalimit të përhapjes së koronavirusit.
Teksa sëmundja COVID-19 përhapet në gjithë botën, qeveri, kompani dhe investitorë janë duke u përballur me krizën më të rëndë të shëndetit publik prej pandemisë së vitit 1918.
Ai ka thënë se e kupton sa e vështirë është që të ndalohet tradita e britanikëve për të vizituar baret, mirëpo një gjë e tillë tani është kthyer në domosdoshmëri.
Mbretëria e Bashkuar deri më tani ka raportuar për 3,983 persona të prekur me koronavirus, pas testimit të 66,976 pesonave.
Shkencëtarët qeveritarë kanë thënë se përhapja e virusit është më e madhe në Londër, pasi disa njerëz nuk janë duke zbatuar këshillin e qeverisë për t’u izoluar.
Deri më tani 177 persona kanë vdekur si pasojë e kësaj sëmundjeje në Britani.
SHBA-ja mbyll kufijtë me Kanadanë dhe Meksikën
Shtetet e Bashkuara kanë pezulluar gjithë trafikun jo të domosdoshëm rreth kufijve me Meksikën dhe Kanadanë, teksa tentojnë të kontrollojnë përhapjen e koronavirusit të ri.
Masat e reja do të nisin së zbatuari në mesnatën e së shtunës, mirëpo nuk do të prekin tregtinë, ka thënë Sekretari amerikan i Shtetit, Mike Pompeo.
Ndërkohë autoritetet në Nju Jork kanë marrë vendim për mbyllje të bizneseve jo të domosdoshme, një ditë pas marrjes së një mase të ngjashme nga Kalifornia.
Përvec SHBA-së, edhe shumë vende tjera në botë janë duke marrë vendime të ngjashme me qëllim të parandalimit të përhapjes së koroanvirusit të ri.
Deri më tani sëmundja Covid-19 që shkakton koronavirusi, ka marrë jetën e mbi 220 personave në SHBA dhe ka infektuar më shumë se 16,000 të tjerë.
Në gjithë botën, gati 250,000 persona kanë rezultuar pozitivë në testimet për koronavirus, derisa mbi 10,000 të tjerë kanë vdekur.
Dita më vdekjeprurëse në Itali
Që nga fillimi i pandemisë së koronavirusit, Italia të premten ka shënuar ditën më vdekjeprurëse – 627 persona të vdekur në 24 orë.
Lajmi u bë i ditur nga shefi i Agjencisë për Mbrojtje Civile, Angelo Borelli, raporton agjencia e lajmeve Associated Press.
Të enjten, Italia e ka kaluar me numër të viktimave Kinën, vendin e origjinës së koronavirusit.
Aktualisht, numri i të vdekurve në Itali është 4,032.
Anëtari i PE-së: Zyrtarët kosovarë të tejkalojnë vështirësitë për hir të koronavirusit
Anëtari i Parlamentit Evropian, Lukas Mandl, u ka bërë thirrje zyrtarëve në Kosovës që të qëndrojnë të bashkuar në ato që i ka cilësuar si kohëra të vështira, për të mundësuar funksionimin e qeverisë në vend të prodhimit të krizës politike.
Sipas tij, ata duhet të veprojnë së bashku për të tejkaluar vështirësitë, për hir të koronavirusit, të cilin e ka cilësuar armik të përbashkët.
Deklaratat e tij vijnë pasi Lidhja Demokratike e Kosovës ka njoftuar se ka dorëzuar në Kuvendin e Kosovës kërkesën për mocion mosbesimi kundër qeverisë së kryeministrit, Albin Kurti.
Lexoni lajmin e plotë duke klikuar këtu.