Kuvendi dështon ta zgjedhë presidentin e Kosovës në mungesë të kuorumit, Haxhiu i drejtohet Kushtetueses

Lista Serbe, partia më e madhe e serbëve të Kosovës, mungon në seancën e sotme, një mungesë e rëndësishme për atë çfarë pritet në vijim.

Për të kaluar ndryshimet kushtetuese të propozuara nga presidentja Vjosa Osmani për zgjedhjen e presidentit të vendit përmes votës së popullit, nevojiten edhe ca vota nga Lista Serbe.

Lista Serbe ka 9 prej 20 vendeve të rezervuara për komunitetet joshumicë dhe kalimi i amendamenteve kërkon 2/3 e votave të këtyre komuniteteve, që nënkupton të paktën tri vota nga kjo parti.

Kryetari i Partisë Demokratike të Kosovës në opozitë, ka thënë se partia e tij nuk mund t’i mbështesë ndryshimet kushtetuese për zgjedhjen e presidentit përmes votës së popullit në mënyrën siç është kërkuar sot.

“Zgjedhja e presidentit të Kosovës nga populli është temë shumë e rëndësishme dhe meriton trajtim serioz institucional dhe politik. E ky trajtim nuk është serioz aspak”, tha Bedri Hamza.

Në parim, tha ai, Partia Demokratike e Kosovës ka qenë, është dhe do të jetë që presidenti të zgjidhet direkt nga populli, por kjo do trajtim serioz dhe duhet të bëhet brenda ligjit dhe Kushtetutës.

“Propozuesja e këtyre amendamenteve, në orët e fundit i gjen disa amendamente të trajtuara para 15 vjetëve. Më vjen keq që edhe Kuvendi po hyn në këtë valle të trajtimit të aktit më të lartë vendit, Kushtetutës së Kosovës, në mënyrë kaq joserioze. Seanca thirret për një çështje kaq të rëndësishme në 7:45, ndërsa deputetët i marrin materialet në orën 8:30”, përfundoi ai.

Shefja e Grupit Parlamentar të partisë në pushtet, Lëvizjes Vetëvendosje, Arbërie Nagavci, tha se kjo parti e mbështet votimin e këtyre amendamenteve, si dhe i ka ftuar edhe deputetët e partive të tjera t’i votojnë ato.

“Përvoja na e ka dëshmuar që procesi i zgjedhjes në Kuvend është shoqëruar me marrëveshje jo parimore politike ose me situata të bllokimit institucional”, tha Nagavci.

Sipas saj ky debat për zgjedhjen e presidentit nga populli nuk është i ri por më shumë se një dekadë dhe është pjesë e një reflektimi institucional.

Më në fund ka nisur seanca e jashtëzakonshme plenare.

Ndiqeni drejtpërdrejt: