Radio Evropa e Lirë

Sulmohet baza e NATO-s

Zyrtarë afganë dhe të NATO-s thanë se disa luftëtarë talibanë janë vrarë, gjatë sulmit të tyre kundër një baze ajrore të aleancës, në pjesën lindore të Afganistanit. Zyrtarët lokalë thanë se së paku një sulmues vetëvrasës ka aktivizuar një makinë bombë afër bazës. NATO-ja kumtoi se forcat e kombinuara afgane dhe ndërkombëtare iu përgjigjën sulmit. Sipas NATO-s, “disa kryengritës u vranë”.

“Larry King Live” drejt fundit

Emisioni “Larry King Live” së shpejti do të shohë fundin. Pas 25 vjetësh transmetim në rrjetin televiziv CNN, pas shumë bisedave me presidentë dhe yje të Hollywood-it, autori Larry King ka njoftuar së në fund të vitit do të përfundojë “show”-n e tij, që transmetohej pesë netë në javë.

FH: Decentralizimi sukses, korrupsioni në rritje…

Arritja më e madhe e Kosovës në vitin 2009 ka qenë zbatimi i decentralizimit dhe procesi zgjedhor, por ka pasur trende negative në planin e lirisë së shtypit dhe korrupsionit në rritje, thuhet në raportin për vitin 2009, të organizatës Freedom House, me seli në Shtetet e Bashkuara.

Krerët e futbollit francez para Parlamentit

Trajneri i kombëtares franceze, Rejmond Domenek, dhe ish-kreu i Federatës së Futbolit, Zhan-Pjer Eskale, do të paraqiten të mërkurën para Parlamentit, për të shpjeguar lojën katastrofike të futbollistëve të Francës, në Kupën e Botës në Afrikën e Jugut. Dy zyrtarët do t'i drejtohen Komisionit për Çështje të Kulturës në Asamblenë Kombëtare.

Arrestimi i agjentëve sekretë rusë

SHBA: Arrestohen 10 agjentë rusë

Zyra Federale e Hetimeve, FBI, ka arrestuar dhjetë persona, nën akuzat se kanë qenë agjentë sekretë të shërbimit rus të zbulimit. Qëllimi i të arrestuarve ishte depërtimi në rrethet e politikë-bërësve amerikanë. Lajmi është bërë i ditur nga Departamenti i Drejtësisë i SHBA-ve. I akuzuari i njëmbëdhjetë, që u ka bërë pagesat dhjetë të arrestuarve, është në arrati.

Rusi: Rritje e vetëvrasjeve të fëmijëve

Para katër muajsh, Sajid Fekretdinov bëri vetëvrasje duke kërcyer nga dritarja e banesës së tij në Moskë. Ai ishte vetëm 10-vjeçar. Prindërit e tij thonë se ngacmimi në shkollë e kishte shtyrë fëmijën e tyre të bëjë vetëvrasje. Por, psikologët thonë se sistemi i dobët mbrojtës i Rusisë, në masë të madhe, është për t’u fajësuar për rritjen e numrit të vetëvrasjeve në mesin e fëmijëve dhe të rinjëve në këtë vend.

G20 pajtohet për nxitjen e ripërtëritjes

A u shpagua borxhi me anglezët?

“Faleminderit Zot i futbollit” titullohet shkrimi në gazetën më të madhe gjermane pas fitores së Gjermanisë kundër Anglisë, me rezultat 4:1, më i larti në 16 ndeshjet e fundit midis dy skuadrave. “Pas 44 vjetësh, goli i Uemblit më në fund u barazua. Tash, anglezët e dinë se si jemi ndjerë ne gjatë kësaj kohe”, shkruan Bild.

Toronto: Mbi 400 të arrestuar gjatë protestave

Më shumë se 400 njerëz janë arrestuar gjatë protestave në Toronto kundër samitit ekonomik të G20-ës, njoftoi policia kanadeze. Gjatë trazirave u është vënë flaka automjeteve dhe janë thyer vitrinat e shitoreve në qendër të qytetit. Zëdhënësi i policisë së Torontos, Tim Barous, tha se gjithsejtë 412 njerëz janë arrestuar.

Stalinit i hiqet statuja në vendlindje

Autoritetet kanë hequr statujën e diktatorit sovjetik, Josef Stalin, e cila prej dekadash ishte vendosur në qytetin e tij të lindjes, Gori, në Gjeorgji. Presidenti gjeorgjian, Mikheil Sakashvili, u tha gazetarëve në Tbilisi se "largimi i statujës është i arsyeshëm". Bëhet e ditur se në vend të saj do të vendoset një monument i viktimave të konfliktit Gjeorgji-Rusi.

Samiti i bashkëpunimit rajonal

Zyrtarë kosovarë thonë se samiti i Prizrenit dëshmon përcaktimin e qartë të Kosovës, Shqipërisë, Maqedonisë dhe Malit të Zi për proceset integruese, duke u larguar kështu nga mentalitetet e vjetra të konfrontimeve.

Obama dhe Medvedev drekuan hamburgerë

Presidenti i Shteteve të Bashkuara, Barak Obama, dhe homologu i tij rus, Dmitri Medvedev, i kanë bërë vizitë të papritur një lokali të njohur të hamburgerëve. Dy presidentët kanë drekuar hamburgerë në Ray’s Hell Burger, pas takimit që zhvilluan në Shtëpinë e Bardhë. Në konferencën e përbashkët për media, Obama e vlerësoi Medvedevin si partner të fortë dhe të besueshëm.

Afganistan: Të lodhur nga lufta

Banorët e provincës afgane Kandahar, që ndryshe njihet edhe si bastion i talibanëve, shprehen të lodhur nga lufta, dhuna dhe mungesa e sigurisë. Shumica nga ta mendojnë se duhet të ndalojnë ofensivat ushtarake dhe të bëhet paqe me kryengritësit talibanë.

Obama: Gjenerali tregoi 'gjykim të dobët'

Presidenti i Shteteve të Bashkuara, Barak Obama, takohet sot me kryekomandantin e tij në Afganistan, pas vërejtjeve kundërthënëse që ai i kishte bërë në një revistë amerikane. Obama tha se dëshiron të dëgjojë nga vetë gjenerali Stenli MekKristal, përpara se të marrë ndonjë vendim, përfshirë shkarkimin eventual të tij. Obama tha se MekKristal dhe bashkëpunëtorët e tij kanë treguar “gjykim të dobët”.

Gjenerali urdhërohet t’i shpjegojë kritikat

Dita Ndërkombëtare e Refugjatëve

Në raportin e sivjetmë të UNHCR-së mbi zhvillimet në botë në vitin 2009, llogariten 43.3 milionë të zhvendosur për shkak të konflikteve të ndryshme. Numri i të kthyerve vullnetarisht në shtëpitë e tyre thuhet të jetë në nivelin më të ulët në 20 vjetët e fundit. Me vendim të Asamblesë së Kombeve të Bashkuara, 20 Qershori shënohet si Dita Ndërkombëtare e Refugjatëve.

Me gjithë hezitimet, imazhi i SHBA-ve mbetet pozitiv

Në qershor të vitit 2009 presidenti amerikan Barak Obama kishte vizituar kryeqendrën e Egjiptit në një përpjekje për të zbutur ndasitë ndërmjet botës myslimane dhe Perëndimit.

Botërori në Somali është lojë e rrezikshme

Në Somali, është lojë shumë e rrezikshme të shohësh ndeshjet e Botërorit 2010. Grupet e milicive islamiste, të cilat e konsiderojnë Botërorin si një ngjarje joislamike, kanë paralajmëruar se dashamirët e futbollit do të dënohen nëse i shohin ndeshjet.

Obama kritikon gjigantin BP