Dhjetëra cisterna nafte të bllokuara në Gjirin Persik
Dhjetëra cisterna me naftë janë bllokuar në ujërat e Gjirit Persik, është duke raportuar agjencia e lajmeve Reuters.
Sipas agjencisë, bazuar në të dhënat e faqeve që monitorojnë trafikun në atë zonë, “të paktën 150 cisterna” me naftë të papërpunuar dhe gaz të lëngshëm natyror janë ankoruar pranë Ngushticës së Hormuzit dhe nuk po lëvizin.
Pas sulmeve amerikane dhe izraelite të 28 shkurtit ndaj Iranit, forca detare e Gardës Revolucionare të Iranit ka paralajmëruar se do të bllokojë rrugën e anijeve përmes kësaj ngushtice.
Çfarë është Ngushtica e Hormuzit?
Ngushtica e Hormuzit është një grykë e vogël, por rreth 20 për qind e naftës së botës qarkullon nëpër të – apo mbi 15 milionë fuçi çdo ditë.
Shtetet sikurse Arabia Saudite, Iraku, Emiratet e Bashkuara Arabe, Kuvajti dhe Katari – madje edhe vetë Irani – varen nga kjo ngushticë për të eksportuar naftë dhe gaz.
Prandaj, nëse diçka e bllokon ngushticën, efektin e vëren e gjithë bota.
Irani ka kërcënuar me mbyllje të ngushticës edhe në të kaluarën. Dhe, teknikisht mundet ta bëjë këtë – duke e bërë kalimin nëpër të shumë të rrezikshëm, ose edhe duke ndalur përkohësisht mallrat.
Irani ka ndërtuar fuqi të madhe në rajon: anije të shpejta sulmuese, mina detare dhe raketa kundëranije.
Për të treguar seriozitetin, Irani ndër vite ka kryer stërvitje, dhe me raste i ka penguar anijet.
“Rruga e Khameneit do të vazhdojë”
Ministria e Jashtme e Iranit ka thënë se rruga e Ali Khameneit – liderit suprem të Iranit të vrarë nga sulmet amerikane dhe izraelite – do të vazhdojë, teksa i ka dënuar ashpër këto sulme që janë kryer, pavarësisht se ishin duke u zhvilluar bisedime diplomatike mes Teheranit dhe Uashingtonit për programin bërthamor të Iranit.
Sulmet e fundit janë kryer teksa Omani po i ndërmjetësonte bisedimet mes SHBA-së dhe Iranit. Rundi i fundit i bisedimeve është mbajtur më 26 shkurt.
Kush është në krye të Iranit tani?
Zyrtari kryesor i sigurisë në Iran, Ali Larijani tregoi më parë se është duke u themeluar një Këshill i përkohshëm i udhëheqjes së re, pasi sulmet amerikane dhe ato izraelite vranë figura të larta shtetërore, përfshirë liderin suprem, Ajatollah Ali Khamenei.
Alireza Arafi, figurë me rëndësi prej kohësh në udhëheqësinë klerike të Iranit, është emëruar në Këshill si figurë e përkohshme zëvendësuese e Khameneit. Ai është tani përkrah presidentit, Masud Pezeshkian dhe kreut të gjyqësorit, Gholamhossein Mohseni-Ejei.
Ky bord prej tre personash do ta udhëheqë Iranin derisa Asambleja e Ekspertëve të mblidhet për ta zgjedhur liderin e ri suprem.
Turmat rrëzojnë statujën e Khomeinit
Turma njerëzish në qytezën iraniane Galleh Dar e kanë rrëzuar një përmendore dedikuar themeluesit të Republikës Islamike, Ajatollah Ruhollah Khomeini.
Vdekja e Khameneit ka nxjerrë në pah përçarje të madhe në këtë vend të tronditur nga rënia e papritur e njeriut që sundoi për 36 vjet.
Video e publikuar nga agjencia e lajmeve Reuters: