PDK kërkon rezolutë për Gjykatën Speciale në seancën konstituive
Nënkryetarja e Partisë Demokratike të Kosovës, Vlora Çitaku, bëri të ditur se PDK-ja do të propozojë një rezolutë për procesin në Gjykatën Speciale, në seancën e parë të punës së Kuvendit të Kosovës.
Në një konferencë për media, Çitaku dhe bashkëpartiaku i saj, Përparim Gruda, prezantuan rezolutën, e cila, sipas tyre, është hartuar nga ekspertë të pavarur.
Deklarata u dha pak para seancës konstituive dhe gjatë ditës kur në Hagë u zhvillua fjalimi i mbrojtjes së ish-presidentit Hashim Thaçi, i akuzuar për krime lufte.
Gruda tha se rezoluta kërkon që procesi në Hagë të “të kthehet në binarë të standardeve evropiane për gjykim të drejtë dhe të paanshëm” dhe propozoi që Avokati i Popullit të luajë rol në këtë çështje.
Rashiti: Nuk pres pengesa në konstituimin e institucioneve
Njohësi i zhvillimeve politike në Kosovë, Naim Rashiti, vlerëson se pas rezultateve të zgjedhjeve të dhjetorit, skena politike ka hyrë në një fazë më të qartë, që e bën të mundur konstituimin e Kuvendit pa pengesa të mëdha.
Sipas tij, zgjedhjet e dhjetorit treguan se subjektet politike humbën një vit kohë, për shkak të mungesës së bashkëpunimit, duke përfshirë edhe fituesen e zgjedhjeve, Lëvizjen Vetëvendosje, por edhe partitë e tjera opozitare.
“Tani, rezultati është më i qartë - e lejon Lëvizjen Vetëvendosje ta konstituojë Kuvendin dhe ta formojë Qeverinë vetëm, pa ndihmën e ndonjë subjekti”, thotë Rashiti për Radion Evropa e Lirë.
Ai beson se ekziston pajtim i përgjithshëm mes subjekteve politike që institucionet duhet të konstituohen - nga Kuvendi deri te Presidenti - dhe se askush nuk ka interes të rrezikojë të shkojë në zgjedhje të reja.
Sipas tij, edhe çështja kontestuese rreth përfaqësimit të Listës Serbe pritet të zgjidhet përmes votimit në pako të nënkryetarëve të Kuvendit - çka tregon për një “maturim” të partive për ta përmbyllur procesin.
Rashiti shton se nuk sheh sinjale për ndonjë koalicion të mundshëm qeverisës.
“Nuk besoj se për zgjedhjen e kryetarit të Kuvendit apo për formimin e Qeverisë do të ketë gatishmëri për negociata për koalicion”, përfundon Rashiti.
Kush do ta drejtojë seancën sot?
Seanca do të drejtohet nga deputeti më i vjetër, Avni Dehari (LVV), i ndihmuar nga deputetja më e re, Fatma Taçi (KDTP).
Rendi i ditës:
- Formimi i Komisionit të përkohshëm për verifikimin e kuorumit dhe të mandateve të deputetëve;
- Betimi i deputetëve;
- Zgjedhja e kryetarit të Kuvendit;
- Zgjedhja e nënkryetarëve të Kuvendit.
Kujtojmë rezultatet e zgjedhjeve...
Në zgjedhjet e 28 dhjetorit, 2025, Lëvizja Vetëvendosje doli forca e parë, me mbi 51 për qind të votave, duke fituar 57 nga 120 ulëset e Kuvendit.
Partia Demokratike e Kosovës mori 22 mandate, Lidhja Demokratike e Kosovës 15, ndërsa Aleanca për Ardhmërinë e Kosovës 6.
Njëzet ulëse janë të rezervuara për komunitetet joshumicë - dhjetë për komunitetin serb dhe dhjetë për komunitetet e tjera që jetojnë në Kosovë.
Komunitetit boshnjak i takojnë tri mandate, atij turk dy, ndërsa komuniteteve rom, ashkali dhe egjiptian nga një mandat secilit, plus një mandat shtesë për komunitetin më të votuar nga këto tri komunitete.
Një mandat i takon edhe komunitetit goran.
