Policia tenton t’i shpërndajë protestuesit teksa tensionet vazhdojnë
Policia e Kosovës po bën përpjekje t’i shpërndajë protestuesit duke i larguar ata nga sheshi “Skënderbeu”, duke hedhur gaz lotsjellës ndaj tyre.
Oficerë të policisë për kontrollin e trumave të trazirave e kanë krijuar një kordon në këtë shesh të kryeqytetit dhe po vazhdojnë t’i shtyjnë protestuesit larg ndërtesës së Qeverisë dhe Kuvendit të Kosovës.
Ata po tentojnë t'i largojnë protestuesit edhe përtej sheshit "Nënë Tereza", që ndodhet ngjitur me sheshin "Skënderbeu".
Ndërkohë, është raportuar edhe për disa protestues të lënduar. Radio Evropa e Lirë po përpiqet ta konfirmojë këtë.
Haradinaj: Mund të kthehemi në Kuvend në çdo orë
Ramush Haradinaj nga Aleanca tha se deputetët mund të kthehen në Kuvend në çdo kohë për ta votuar në lexim të dytë projektligjin për ndryshimin e Ligjit për Dhomat e Specializuara.
“Unë besoj se në çdo orë mund të kthehemi në Kuvend dhe ta votojmë ligjin”, tha Haradinaj para gazetarëve.
Ai kritikoi Lëvizjen Vetëvendosje, duke thënë se “ikja nga përgjegjësia është vepër e dënueshme”.
Pamje nga zhvillimet pranë dhe në Kuvend
Protestuesit janë përleshur me Policinë, teksa tensionet para Kuvendit të Kosovës janë përshkallëzuar. Policia përdori gaz lotsjellës pasi disa protestues hodhën mjete piroteknike drejt Kuvendit.
Policia: Gazi lotsjellës u përdor për të mundësuar daljen e deputetëve nga Kuvendi
Policia e Kosovës tha se përdori gaz lotsjellës mbrëmjen e 5 tetorit për të mundësuar daljen e deputetëve dhe zyrtarëve nga Kuvendi, pasi një grup protestuesish ua kishte penguar largimin.
Sipas njoftimit, protestuesit hodhën gjësende dhe mjete piroteknike drejt ndërtesave shtetërore, ndërsa disa deputetë e zyrtarë u detyruan të ktheheshin brenda Kuvendit.
Policia raportoi dëme materiale nga hedhja e mjeteve piroteknike dhe ndezja e kontejnerëve të mbeturinave e zjarreve në rrugë. Sipas saj, deri në publikimin e njoftimit nuk ishte raportuar për lëndime serioze.
Protestuesit kërkojnë miratimin përfundimtar të ndryshimeve në Ligjin për Gjykatën Speciale. Policia tha se protesta po vazhdon dhe u bëri thirrje pjesëmarrësve të protestojnë paqësisht.
