Si lidhet Specialja me zgjedhjen e presidentit?
Shqyrtimi i projektligjit vjen vetëm një ditë para skadimit të afatit për zgjedhjen e presidentit të Kosovës.
Sipas vendimit të Gjykatës Kushtetuese, afati 60-ditor për zgjedhjen e presidentit ka filluar më 8 gusht dhe përfundon më 6 tetor.
Nëse presidenti nuk zgjidhet brenda këtij afati, Kuvendi shpërndahet dhe vendi shkon në zgjedhje të reja parlamentare.
PDK-ja e ka kushtëzuar gatishmërinë e saj për të ndihmuar në zgjedhjen e presidentit me miratimin përfundimtar të ndryshimeve në Ligjin për Dhomat e Specializuara.
Kryetari Bedri Hamza ka thënë se partia e tij, e cila ka 22 deputetë, është e gatshme të diskutojë dhe të ofrojë votat për presidentin pasi Kuvendi ta përfundojë miratimin e ligjit.
Gjatë fundjavës, kryeministri Albin Kurti ka zhvilluar takime të ndara me Hamzën dhe kryetarin e Lidhjes Demokratike të Kosovës, Lumir Abdixhiku, në përpjekje për të gjetur një rrugëdalje para skadimit të afatit kushtetues.
Për zgjedhjen e presidentit kërkohen 80 vota në dy rundet e para.
Nëse asnjë kandidat nuk e siguron këtë shumicë, në rundin e tretë nevojiten 61 vota, por për zhvillimin e procesit duhet të jenë të pranishëm së paku 80 deputetë.
Lëvizja Vetëvendosje e Kurtit ka 53 deputetë.
Qeveria e saj u zgjodh me 62 vota, pasi atë e mbështetën edhe tetë deputetë të komuniteteve joserbe dhe deputeti serb, Nenad Rashiq.
Me 22 deputetët e PDK-së, do të sigurohej numri i nevojshëm i deputetëve për zhvillimin e procesit të zgjedhjes së presidentit.
Komisioni i hap rrugë projektligjit për Specialen
Komisioni për Legjislacion e ka miratuar projektligjin për ndryshimin e Ligjit për Dhomat e Specializuara.
Nëntë deputetë të pranishëm votuan në favor, pa asnjë votë kundër apo abstenim.
Projektligji pritet të kalojë tani në seancën e Kuvendit, e cila është caktuar të nisë në orën 09:00.
A mund të përfundojë ligji para afatit për presidentin?
Miratimi i mundshëm i projektligjit në lexim të parë nuk nënkupton se ai ka përfunduar procedurën parlamentare.
Pas votimit në parim, projektligji duhet të kthehet në komisionin përgjegjës për shqyrtim nen për nen dhe për amendamente, para se të rikthehet në seancë për lexim të dytë dhe votim përfundimtar.
Rregullorja e Kuvendit lejon shmangien nga afatet e zakonshme procedurale në raste të caktuara, nëse këtë e propozojnë së paku gjashtë deputetë dhe e mbështesin dy të tretat e deputetëve të pranishëm, me kusht që shmangia të mos jetë në kundërshtim me Kushtetutën.
Seanca nuk ka nisur ende
Ndonëse ishte paralajmëruar të niste në orën 09:00, seanca e Kuvendit të Kosovës për shqyrtimin e ndryshimeve në Ligjin për Dhomat e Specializuara nuk ka filluar ende.
