LDK-ja e gatshme për zgjedhje në çfarëdo kohe, thotë Abdixhiku
Kryetari i Lidhjes Demokratike të Kosovës, Lumir Abdixhiku, ka thënë se partia e tij është e gatshme për zgjedhje të parakohshme kurdo që presidentja Osmani vlerëson se duhet të mbahen ato.
Ai tha se në takim pati “diskutime zyrtare për datën e zgjedhjeve”.
“Kurdo që presidentja vlerëson për afatin kushtetues të rregullt brenda parashikimeve kushtetuese”, ka thënë ai, pas takimit konsultativ me Osmanin e përfaqësuesit e subjekteve të tjera.
Kurti thërret konferencë për shtyp
Kryeministri i Kosovës, Albin Kurti, pritet të flasë për media pas disa orësh.
Zëdhënësi i Qeverisë, Arlind Manxhuka, njoftoi në Facebook se konferenca do të mbahet në orën 16:00.
Këshilltari i Kurtit për Osmanin: Zelli për pushtet e çoi në gabim
Jeton Zulfaj, këshilltar i kryeministrit Albin Kurti, reagoi sërish në Facebook në lidhje me vendimin e presidentes Osmani për të shpallur zgjedhjet të parakohshme.
Këtë dekret ajo e shpalli një ditë pas një tentative të dështuar për të zgjedhur presidentin e vendit, më 5 mars.
Zulfaj tha se ky vendim është “jokushtetues”.
“Pas pesë vjetësh që Vetëvendosje i dha rastin të shërbejë në pozitën më të lartë të shtetit, në vend që ta përfundojë mandatin me dinjitet, ajo si akt të fundit zgjodhi shkeljen e Kushtetutës dhe sulmin ndaj subjektit që e bëri presidente”, shkroi ai.
Presidentja aktuale dhe Qeveria po kundërshtojnë njëra-tjetrën sa i përket interpretimit të Kushtetutës që ka të bëjë me afatet e zgjedhjes së presidentit.
Hasani: Osmani i ka “uzurpuar” kompetencat e Kuvendit të Kosovës
Dekreti i presidentes së Kosovës, Vjosa Osmani, për shpërndarjen e Kuvendit është jokushtetues, vlerëson ish-kryetari i Gjykatës Kushtetuese të Kosovës, Enver Hasani, në një intervistë për Radion Evropa e Lirë.
Sipas tij, Osmani nuk ka të drejtë ta shpërndajë Kuvendin, i cili nga sot ka 60 ditë kohë për zgjedhjen e presidentit.
Ai shpjegon se, vetëm në rast se dështon brenda këtij afati, Kuvendi shpërndahet me automatizëm dhe shkohet në zgjedhje të parakohshme parlamentare.
Hasani thekson se konsultimet e partive politike me presidenten për çështjen e caktimit të datës së zgjedhjeve, janë “fiktive dhe jokushtetuese”, si dhe kanë për qëllim “të përligjin rrënimin e rendit kushtetues, për shkak të uzurpimit të kompetencave nga ana e zonjës Osmani”.
Më shumë këtu:
