LVV mund t’i drejtohet Kushtetueses nëse dështon zgjedhja e presidentit sonte
Këshilltari i kryeministrit Albin Kurti, Jeton Zulfaj, ka paralajmëruar se do t'i drejtohen Gjykatës Kushtetuese nëse dështon zgjedhja e presidentit deri në përfundim të afatit kushtetues sonte në mesnatë.
Në disa postime të ndara në Facebook të enjten, Zulfaj ka thënë se mospjesëmarrja e deputetëve në votimet për presidentin përbën shkelje kushtetuese.
“A shkohet në zgjedhje në mënyrë automatike nëse dështon rundi i tretë për mungesë kuorumi prej 2/3-ve? Jo. Deputetët, sipas aktgjykimit të Gjykatës Kushtetuese KO29/11, janë të obliguar të marrin pjesë në tri votimet për presidentin. Mospjesëmarrja e tyre nuk e dërgon vendin automatikisht në zgjedhje; përkundrazi, çështja dërgohet në Gjykatën Kushtetuese, pasi mospjesëmarrja përbën shkelje të Kushtetutës”, ka shkruar ai.
Lëvizja Vetëvendosje e propozoi Glauk Konjufcën kandidat për president. Deri më tani, synimin për edhe një mandat në krye të shtetit e ka shprehur edhe presidentja Vjosa Osmani, por nënshkrimet për t'u nominuar si kandidate nuk janë mbledhur ende.
Që seanca për zgjedhjen e presidentit të zhvillohet në garë duhet të jenë së paku dy kandidatë.
Zulfaj tha se Osmani është zgjedhur kryeparlamentare dhe presidente me votat e Lëvizjes Vetëvendosje, por partia e Kurtit nuk ia ka më borxh ta zgjedhë prapë.
“Asnjë figurë e Lëvizjes Vetëvendosje nuk i ka mbajtur të dyja pozitat, pavarësisht kontributit dhe atributeve të tyre”, ka shkruar Zulfaj në Facebook.
Sipas tij, përveç presidentes Atifete Jahjaga, posti i presidentit është mbajtur nga figura partiake e kësisoj, thotë Zulfaj, ka qenë edhe Osmani kur është zgjedhur pesë vjet më parë.
“Vjosa sot nuk përfaqëson një subjekt politik, por nuk është figurë konsensuale, pasi karrierën e saj e ka ndërtuar si pjesë e subjekteve politike. Vjosa është figurë e nderuar, ish-kryeparlamentare dhe presidente dhe e denjë për çdo pozitë, por Vetëvendosje nuk ia ka borxh Vjosës ta bëjë presidente”.
Më tej Zulfaj ka thënë se Gjykata Kushtetuese e ka “ndërlikuar pa nevojë” zgjedhjen e presidentit.
“Kushtetuta ka përcaktuar qartë tri votime për zgjedhjen e presidentit, ku në votimin e tretë thuhet se ‘...kandidati që merr shumicën e votave të të gjithë deputetëve zgjidhet President i Republikës së Kosovës’. Gjykata votimin e tretë e ka barazuar praktikisht me dy votimet e para, ku kërkohen dy të tretat (2/3). Ky ka qenë një interpretim i dobët, sepse edhe pse kërkon pjesëmarrjen e deputetëve në votim, nuk parashikon mekanizma detyrues për këtë pjesëmarrje. Kësisoj është ndryshuar norma e Kushtetutës, e cila votimin e tretë e kishte paraparë si mekanizëm për dalje nga bllokada”.
Vullnet a obligim: Deputetët para procesit për zgjedhjen e presidentit
Ditëve të fundit janë shfaqur paqartësi rreth asaj nëse pjesëmarrja dhe votimi në seancën për presidentin përbëjnë obligim për deputetët, apo edhe nëse moszgjedhja e presidentit nga Kuvendi çon vendin përsëri në zgjedhje të parakohshme.
Çfarë thonë Kushtetuta dhe aktgjykimet e Gjykatës Kushtetuese? Si e vlerësojnë njohësit e fushës këtë çështje?
Më shumë këtu:
Ende s'dihet nëse do të ketë seancë
Kryeministri i Kosovës, Albin Kurti ka bërë të ditur se do të bëjë përpjekje edhe pasdite për ta finalizuar procesin e zgjedhjes së presidentit, por ende nuk dihet nëse do të ketë seancë apo në sa ora mund të mbahet.
Abdixhiku: Nuk i takon opozitës të propozojë kandidatë
Kryetari i Lidhjes Demokratike të Kosovës, Lumir Abdixhiku, është shprehur i bindur se, pas mesnatës, Kosova do të futet në afatet kushtetuese për zgjedhje të reja, për shkak të asaj që ai e quajti “dështim” të institucioneve për të arritur marrëveshje për postin e presidentit.
LVV-ja - që tashmë e ka propozuar minstrin e Punëve të Jashtme, Glauk Konjufcën, për këtë post - ka kërkuar që opozita ta propozojë kandidatin tjetër.
Kjo kërkesë e LVV-së shihet si e paarsyeshme nga kreu i LDK-së.
“Kjo s’është rrjedha logjike e procesit. Nuk i takon opozitës të propozojë kandidatë. Kandidati që propozohet, duhet të zgjidhet. Ne kemi dashur dhe kemi pasur kandidat konsensual që përfaqëson së paku dy të tretën e popullsisë. Presidenti s’bëhet me kandidatura të njëanshme”, tha Abdixhiku.
Kushtetuta kërkon dy kandidatë për ta çelur zyrtarisht procesin e zgjedhjes së presidentit. LVV-ja ka mjaftueshëm vota për të propozuar edhe një kandidat tjetër, meqë ka mbështetjen edhe të dhjetë deputetetëve nga komunitetet joshumicë.