Kuvendi dështon ta zgjedhë presidentin e Kosovës në mungesë të kuorumit, Haxhiu i drejtohet Kushtetueses

Kuvendi i Kosovës sapo njoftoi se seanca e orës 22:00 ka të bëjë me zgjedhjen e presidentit të Kosovës.

Paraprakisht kishte përpjekje që të ndryshohej Kushtetuta për ta mundësuar zgjedhjen e presidentit përmes votës së popullit e jo Kuvendit.

Por, kjo dështoi dhe tani do të ketë përpjekje të re për zgjedhjen e presidentit përmes votës së deputetëve.

Kryetarja e Kuvendit të Kosovës, Albulena Haxhiu, njoftoi se seanca e ardhshme do të mbahet pas gjysmë ore, pra në orën 22:00.

Nuk është e qartë nëse pas 30 minutave do të ketë deputetë të mjaftueshëm për t’i kaluar ndryshimet kushtetuese në votim.

Ndryshimet kushtetuese të propozuara nga presidentja Vjosa Osmani – që presidenti i Kosovës të zgjidhet përmes votës së popullit e jo nga Kuvendi – nuk kanë kaluar.

Të pranishëm ishin vetëm 93 deputetë, përfshirë 9 nga komuniteti joshumicë, nga 120 deputetë sa ka Kuvendi.

Për kalimin e tyre nevojiteshin votat e dy të tretave të të gjithë deputetëve të Kuvendit, përfshirë dy të tretat e të gjithë deputetëve nga komunitetet joshumicë.

Në seancë munguan deputetët e Listës Serbe, e cila ka 9 vende.

Prandaj, kryetarja e Kuvendit, Albulena Haxhiu nuk i hodhi fare në votim amendamentet dhe tha se do të ketë seancë të re.

Kryetari i Lidhjes Demokratike të Kosovës (LDK), Lumir Abdixhiku, tha se partia e tij i mbështet në parim dhe i voton këto amendamente.

Por, sipas tij, këto ndryshime nuk janë miratuar për tërë këto vite si shkak i mungesës së votave nga deputetët e pakicës.

“Edhe po t’i kalojmë, duket se nuk i kemi pakicat këtu”, tha ai.