Muhaxhiri: Zhvillimet në Kuvend, “maskaradë dhe parodi”
Sociologu dhe njohësi i çështjeve politike, Artan Muhaxhiri, i ka cilësuar si “maskaradë dhe parodi” zhvillimet në vazhdimin e seancës konstituive të Kuvendit të Kosovës, e cila u ndërpre pa u finalizuar plotësisht procesi.
Zgjedhjen e deputetit të Lëvizjes Vetëvendosje (LVV), Dimal Basha për kryetar të Kuvendit të Kosovës, ai e sheh si një përfundim të logjikshëm të nyjës së krijuar tash e disa muaj për zgjedhjen e kryeparlamentarit.
“Kjo maskaradë dhe parodi nuk ka pasur asnjë gjasë që të përfundojë me ndonjë personalitet nga eshaloni i parë i Lëvizjes Vetëvendosje. Prandaj edhe zoti Basha është zgjedhur si një kompromis dhe si një përfaqësues i lojës së Vetëvendosjes, e cila disi është dashur që të marrë fund. Dihet qartë që zoti Basha nuk i takon ‘radhës’ së parë të Lëvizjes Vetëvedosje”, vlerësoi Muhaxhiri për Radion Evropa e Lirë.
Ai shtoi se propozimi i Bashës ishte “lojë” e liderit të LVV-së, Albin Kurti, që sipas tij, t’i vendosë “para aktit të kryer partitë ish-opozitare (PDK-në, LDK-në dhe AAK-në)”, për shkak se bllokada në konstituimin e Kuvendit, në diskursin publik, filloi t’iu adresohet si faj edhe këtyre partive.
“Kështu, ato u detyruan ta japin një zotim publik se do ta votojnë çdo kandidat që nuk ka qenë në Qeverinë e kaluar, madje edhe Bashën, të cilin e kanë përqeshur. Kjo, për shkak se zotimi i tyre ishte dhënë blanko”, theksoi Muhaxhiri.
Procesi i konstituimit është bllokuar për shkak të mungesës së konsensusit për ta zgjedhur nënkryetarin serb.
Lista Serbe, partia më e madhe e serbëve në Kosovë, e ka propozuar tri herë radhazi emrin e Sllavko Simiqit, mirëpo ai nuk i ka marrë 61 votat e nevojshme.
Muhaxhiri e sheh këtë situatë si ‘kurth’ të Lëvizjes Vetëvendosje, në të cilin ranë edhe partitë
tjera shqiptare, të cilat votuan për dy nënkryetarët e komuniteve joshumicë veç e veç.
Sipas tij, mosvotimi i dy nënkryetarëve të komuniteteve joshumicë në një pako, mund të kontestohet, sipas tij, si shkelje e praktikave të votimit në frymën kushtetuese në Kuvend.
“Besoj që kjo lëndë do të dërgohet në Gjykatën Kushtetuese, e cila sërish do të jetë vendimtare për normalizimin e skenës politike në Kosovë”, u shpreh Muhaxhiri.
Ai tha se mundësitë që Lista Serbe t'i sigurojë 10 nënshkrime të deputetëve për ta dërguar çështjen në Gjykatën Kushtetuese janë reale, dhe se kjo mund të ndodhë para kryerjes së afatit 30-ditor për konstituimin e Kuvendit, i cili përfundon më 18 shtator, sipas vendimit të Gjykatës Kushtetuese, të publikuar më 18 gusht.
Krejt çfarë ndodhi sot në Kuvend
Përpjekja e 58-të për konstitutim të Kuvendit rezultoi pjesërisht e suksesshme.
Dimal Basha u zgjodh kryetar me votat e partisë së tij, Lëvizjes Vetëvendosje dhe të dy partive tjera të mëdha shqiptare, Partisë Demokratike të Kosovës (PDK) dhe Aleancës për Ardhmërinë e Kosovës (AAK).
Sikurse këto dy parti PDK dhe AAK, ashtu edhe Lidhja Demokratike e Kosovës e kritikuan përzgjedhjen e Bashkës për këtë pozitë, duke mos e konsideruar të denjë.
Albulena Haxhiu, Vlora Çitaku dhe Kujtim Shala u zgjodhën nënkryetarë në një votim në pako.
Në pozitën e nënkryetares nga pakicat joserbe u zgjodh Emilja Rexhepi, për ta ndarë pozitën më vonë me rotacion me Fidan Jilltan dhe Artan Asllanin.
Megjithatë, procesi është bllokuar te votimi për nënkryetarin serb. Sllavko Simiq është propozuar tri herë nga Lista Serbe – partia më e madhe e serbëve në Kosovë – mirëpo nuk i ka marrë votat e nevojshme, 61 sosh.
Kryetari Basha ka konsideruar se emri i tij është shfrytëzuar, në përputhje me një aktgjykim të Gjykatës Kushtetuese të disa ditëve më parë se një person nuk mund të kandidohet më shumë se tre herë. Lista Serbe ka insistuar se vendimi vlen për pozitën e kryetarit dhe jo për nënkryetarët.
Basha, më pas, e ka nisur një proces të propozimit me short të kandidatëve për nënkryetarin serb, por asnjëri nuk i ka marrë 61 votat e domosdoshme. Votat nuk i ka siguruar as Nenad Rashiq, kryetar i partisë serbe për Liri, Drejtësi dhe Mbijetesë dhe ministër në Qeverinë në detyrë të Kosovës. Deputetë të Lëvizjes Vetëvendosje i kanë kritikuar partitë e mëdha shqiptare pse kanë votuar kundër.
Disa njohës të çështjeve politike besojnë se procesi për konstituim të Kuvendit është jokushtetues pasi votimi për nënkryetarët nga pakicat nuk mund të ndahet, siç ka ndodhur në seancën e 26 gushtit.
Kuvendi konsiderohet i konstituuar vetëm pasi të zgjidhen të pesë nënkryetarët dhe më pas nis rrjedhja e afatit ligjor për formim të Qeverisë.
Seanca për finalizim të konstituimit do të vazhdojë të enjten në orën 11:00.
Faleminderit që ishit me ne!
Maliqi: Ish-opozita, e paguximshme në raport me grackat populiste të Kurtit
Analisti politik, Agon Maliqi e ka kritikuar qasjen e ish-opozitës në Kosovë në seancën për konstituim të Kuvendit, duke e përshkruar qasjen e saj si të pavendosur, “as mish as peshk”, dhe ka thënë se e sheh si të paguximshme në raport me ato që i ka quajtur “gracka populiste” të kryeministrit në detyrë, Albin Kurtit.
“Për sa kohë që Lista Serbe është parti e votuar nga shumica dërmuese e serbëve dhe ligji e sheh veprimin e saj si të rregullt brenda sistemit të Kosovës, ajo do të jetë e pashmangshme në formimin e institucioneve, dhe rrjedhimisht çdo veprim përjashtues ndaj saj do ta detyrojë ndërhyrjen e Gjykatës Kushtetuese”, ka thënë Maliqi përmes një postimi në Facebook.
Sipas tij, procesi vetëm do të zvarritet, Lista Serbe do të forcohet në sytë e komunitetit serb dhe do të thellohet imazhi negativ i Kosovës si vend që i shtyp të drejtat e pakicave.
Kuvendi konsiderohet i konstituuar vetëm pasi të zgjidhen të pesë nënkryetarët dhe më pas nis rrjedhja e afatit ligjor për formim të Qeverisë.
Procesi tani është bllokuar, në mungesë konsensusi për zgjedhjen e nënkryetarit serb. Seanca për finalizim të konstituimit do të vazhdojë të enjten në orën 11:00.
Osmani shpreson që procesi i konstituimit të përmbyllet sa më parë
Presidentja e Kosovës Vjosa Osmani, ka thënë të martën se mirëpret nisjen e zhbllokimit të procesit të konstituimit të Kuvendit, dhe shpreson që ai të përmbyllet sa më parë, në përputhje me Kushtetutën.
Përmes një komunikate për media të lëshuar nga Presidenca, Osmani citohet të ketë thënë se shpreson që sa më parë Kuvendi të votojë edhe Qeverinë e re, si dhe e ka uruar kryetarin dhe nënkryetarët e rinj të Kuvendit.
Qeveria e re mund të formohet vetëm pasi të konstituohet plotësisht Kuvendi me kryetarin dhe pesë nënkryetarët.
Procesi tani është bllokuar, në mungesë konsensusi për zgjedhjen e nënkryetarit serb.
Me “langarecët” në gjuhë, Basha në karrigen e kryekuvendarit
“Langarec” është shprehja që kryetari i ri i Kuvendit të Kosovës, Dimal Basha, ka përdorur shpesh kundrejt atyre që i konsideron kundërshtarë.
“Platformat e langarecave”, “loja e langarecave”, “langarecat e çuditur me Albulenën”, “AGK-ja me langareca”, “Langareca dhe oligarkë”...
Në të paktën pesë postime gjatë gushtit, kjo frazë është përdorur për të kritikuar opozitën, sistemin e drejtësisë, por edhe mediat.
Çfarë nënkupton saktësisht me këtë fjalë, nuk është krejt e qartë.
Materialin e plotë e gjeni këtu:
